Որն է բենզինի թանկացման պատճառը․ պարզաբանում է ՏՄՊՊՀ-ն

Ինչպես արդեն տեղեկացրել ենք՝ բենզինը թանկացել է։ ԼՈւՐԵՐ․com-ի հարցմանն ի պատասխան ՏՄՊՊՀ նախագահի խորհրդական Գայանե Սահակյանը պարզաբանեց՝ ՏՄՊՊՀ-ում ընթանում է բենզինի շուկայի լայնածավալ ուսումնասիրություն Տնտեսական մրցակցության պաշտպանության պետական հանձաժողովի կողմից մայրաքաղաքի մի շարք բենզալցակայաններում իրականացված մոնիթորինգի արդյունքում արձանագրվել է բենզինի իրացման գնի փոփոխություն:

«Ընդհանուր առմամբ, գնի բարձրացումը կազմել է 10 դրամ՝ 1 լիտրի հաշվով: Դեռևս տարեսկզբից բենզինի շուկայում արձանագրվել էր գնային փոփոխություն՝ նվազման ուղղությամբ: Գնի շարունակական նվազումը կազմել էր 50 դրամ՝ 1 լիտրի հաշվով: Վերոնշյալ փոփոխությունների պատճառը և հիմնավորվածությունը պարզելու նպատակով հանձնաժողովը դեռևս հունվարից այս շուկայում լայնածավալ ուսումնասիրություն է սկսել, որը դեռևս ընթացքի մեջ է: Այն ներառում է ներմուծումից մինչև իրացում գնագոյացման ողջ շղթան, ինչպես նաև շուկայի կառուցվածքի ուսումնասիրությունը»,-ասաց նա՝ նշելով, որ երեկ արձանագրված գնային բարձրացումը ևս կներառվի և կդիտարկվի ընթացիկ ուսումնասիրության շրջանակում: 

ՏՄՊՊՀ նախագահի խորհրդականի խոսքով՝ հանձնաժողովը մշտապես վերահսկություն է իրականացնում այս շուկայում, ինչը պայմանավորված է խոշոր տնտեսվարողների առկայությամբ․ «Բենզինի ներկրման և իրացման ոլորտում խոշոր ընկերություններ են հանդիսանում «Ֆլեշ» և «Սի Փի Էս օիլ քորփորեյշն» ընկերությունները: Հանձնաժողովը շարունակում է հետևել վերջիններիս գործունեությանը և մրցակցային հնարավոր խնդիրների առկայության դեպքում կկիրառվեն օրենքով սահմանված համապատասախան միջոցներ»,-ասաց ՏՄՊՊՀ նախագահի խորհրդականը՝ խոստանալով առաջիկայում, բենզինի շուկայի ամբողջական ուսումնասիրության ավարտին արդյունքների մասին տեղեկացնել հանրությանը:

Նշենք, որ մասնավորապես, 1 լիտր ռեգուլյար տեսակի բենզինի գինը 400-ից դարձել է 410 դրամ, պրեմիում տեսակինը՝ 420-ից 430 դրամ: 

Սոնա Հարությունյան