Կայանը կընդունեմ միայն այն վիճակով, որով հանձնել եմ իրենց․ Փարաքարի համայնքապետ

Մարտի 3-ին Արմավիրի մարզի, Փարաքար համայնքի ՝ Թաիրով թաղամասի բնակիչները բողոքի ակցիա էին կազմակերպել: Նրանք բողոքում էին, թե կոյուղաջրերը խառնվել են խմելու ջրին, ջրատար խողովակները քայքայված են, իսկ փողոցները լճերի են վերածվել:

Արմավիրի փոխմարզպետ Կարեն Գրիգորյանը, պատգամավոր Նարեկ Մկրտչյանը և Փարաքար համայնքի ղեկավար Սամվել Վարդանյանը, Փարաքարի Մշակույթի տանը հանդիպեցին բնակիչներին և լսեցին նրանց բողքները: Փոխմարզպետը առաջարկեց խնդիրը վերացնելու համար համապատասխան ծրագիր կազմել: Բնակիչները դրական արձագանքեցին` նշելով, որ կարող են իրենք էլ մասնակցություն ունենալ տարվող աշխատանքներին:

Փարաքարի համայնքապետ Սամվել Վարդանյանը ԼՈՒՐԵՐ․com-ի հետ զրույցում պնդում է , որ Թաիրով թաղամասում կոյուղաջրերի և խմելու ջրի խողովակները քայքայված չեն և ջրերը  չեն խառնվել են իրար:

«Այդ տարածքներում պարզապես անձրևաջրեր են հավաքվել: Համայնքի կոյուղաջրերը որևէ տեղ չեն խառնվել, իսկ մեր խմելու ջուրը սպասարկում է  «Վիոլա ջուր» ընկերությունը՝ բավականին բարձր մակարդակով»,- ասաց համայնքի ղեկավարը:

Հարցին, թե ի՞ նչ է պատրաստվում անել համայնքապետարանը, կա՞ կազմված հստակ ծրագիր ստեղծված խնդիրը վերացնելու համար, Սամվել Վարդանյանը պատասխանեց.

«Մենք կառուցել էինք կոյուղիների մաքրման կայան, որը, սակայն 2016 թվականին հանձնեցինք Ջրային տնտեսության պետական կոմիտեին: Նրանք տարիներ ի վեր չշահագործեցին այն, այդպիսով քայքայվեց: Այսօր նամակ ենք ստացել Ջրային կոմիտեից, որ կայանը  հետ են հանձնում մեզ, բայց ես, ասել եմ, որ կայանը կընդունեմ միայն այն վիճակով, որով հանձնել եմ իրենց»:

Համայնքապետը նշեց, որ Թաիրով թաղամասի այն փողոցները, որտեղ անձրևից հետո ջրեր են լճանում, պետք է քանդեն և բոլոր բազմաբնակարան շենքերի դիմացով անցկացնեն նոր կոյուղագծեր և մաքրեն հավաքվող կեղտաջրերը: Դրա համար, սակայն, պետք է Ջրային կոմիտեի կողմից վերադարձվող կայանը լինի նորմալ վիճակում, որպեսզի կարողանան իրագործել:

Սամվել Վարդանյանի խոսքով, կոյուղագծերը փոխելուց հետո միայն կկարողանան ասֆալտապատել փողոցները և համայնքը բարվոք վիճակի հասցնել:

«Ես պայծառատես չեմ, բայց հուսով եմ, որ այս տարի այդ խնդիրները կկարողանանք լուծել»,- եզրափակելով իր խոսքը ասաց համայնքի ղեկավարը:

Տեսանյութը՝ Armlur.am-ի։