«Սպիտակ հացն առողջությանը վնաս է, ի՞նչ անենք, թանկացնե՞նք». բանավեճ վարչապետի և առողջապահության նախարարի միջև

Կառավարության այսօրվա նիստում Հարկային օրենսգրքում փոփոխությունների և հարակից նախագծերի քննարկման ժամանակ թեժ բանավեճ տեղի ունեցավ վարչապետ Նիկոլ Փաշինյանի և առողջապահության նախարար Արսեն Թորոսյանի միջև։

Հարկային օրենսգրքի նախագծի քննարկման ժամանակ Արսեն Թորոսյանը դժգոհեց, որ Ֆինանսների նախարարությունից նախագծի վերջնական տարբերակը ստացել են այսօր առավոտյան ժամը 10-ին:

Արսեն Թորոսյանը դժգոհություն հայտնեց IQOS-ների հարկային դրույքաչափերից, ասաց, որ իրենք՝ որպես շահագրգռված անձ, ներգրավված չեն եղել քննարկումներին:

Վարչապետը բարկացավ, թե ինչո՞ւ տեղյակ չեն եղել քննարկումներից այն դեպքում, երբ փաստաթուղթը մի քանի ամիս է քննարկվում է. «Որ ՀԿ-ն ասում է՝ մեզ չեն ներգրավել քննարկումների մեջ, ես հասկանում եմ, որ նախարարն է ասում՝ մեզ չեն ներառել քննարկումների մեջ, ինձ համար անհասկանալի է»,- նշեց Նիկոլ Փաշինյանը:

«Եկեք ծխախոտի արտադրությունն արգելենք: Ինչի՞ չեք առաջարկում արգելել ծխախոտի օգտագործումն ու արտադրությունը ՀՀ-ում: Իրան չի հետաքրքրում բյուջեի մուտքը, իրան հետաքրքրում է՝ էնքան թանկ լինի, որ ոչ ոք չծխի: Պարո՛ն Թորոսյան, մենք կառավարություն ենք, չենք կարող լինել միայն առողջապահության նախարարություն: Հիմա, պետք է հարկային եկամուտների, առողջապահության, գյուղացիների գյուղմթերքի մթերման մասին էլ մտածենք»,- ասաց վարչապետը:

Մանրամասները՝ տեսանյութում

Տեսանյութը՝ Ազատություն Ռադիոկայանի