«Սպայկա»-ի տնօրենը ձերբակալվել է, բայց Փաշինյանի գրառման հետ կապ չունի. Դավիթ Անանյան
Տնտեսություն
ՊԵԿ հետաքննական վարչությունը «Սպայկա» ընկերությունում ստուգումներ է իրականացրել, որից հետո ընկերության տնօրեն Դավիթ Ղազարյանը ձերբակալվել է: Տեղեկությունը ԼՈւՐԵՐ.com-ի հետ զրույցում հաստատեց Պետական եկամուտների կոմիտեի նախագահ Դավիթ Անանյանը՝ պատասխանելով հարցին ճի՞շտ են տարածված տեղեկությունները, թե ոչ:
Նշենք, որ քիչ առաջ վարչապետ Նիկոլ Փաշինյանը իր ֆեյսբուքի էջում գրել էր, որ իր անմիջական ցուցումով քրեական գործ է հարուցվել իր մի մերձավոր ազգականի թույլ տված ենթադրյալ չարաշահման փաստի առիթով:
Անանյանից հետաքրքրվեցինք՝ «Սպայկա» ընկերության տնօրենի ձերբակալությունը կապ ունի՞ վարչապետ Փաշինյանի գրառման հետ, ՊԵԿ նախագահը բացասական պատասխան տվեց:
Նշենք, որ ընդամենը մեկ շաբաթ առաջ տեղի ունեցած «Սպայկա» ընկերության պանրի գործարանի հանդիսավոր բացմանը մասնակցում էր նաև վարչապետ Նիկոլ Փաշինյանը։
Հիշեցնենք, որ դեռևս 2018 թ. հուլիսին ՊԵԿ խոշոր և միջին հարկ վճարողների հարկային տեսչությունը հայտարարել էր, որ «Սպայկան» ընկերությունը իրականությանը չհամապատասխանող հայտարարագրեր է ներկայացրել, ինչի արդյունքում պետական բյուջե չի վճարվել 2,045,282,459 դրամ գումար:
Սոնա ՀԱՐՈՒԹՅՈՒՆՅԱՆ
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
