Կալանավորելով ընկերության տնօրենին՝ գլխատում են ամբողջ «Սպայկան». մթերող

Արդեն տեղեկացրել էինք, որ Նոր-Նորք և Կենտրոն վարչական շրջանների ընդհանուր իրավասության դատարանի դիմաց բողոքի ակցիա է իրականացվում՝ ի պաշտպանություն «Սպայկա» ՍՊԸ-ի տնօրեն Դավիթ Ղազարյանի։

Ակցիայի մասնակից և ընկերության հետ համագործակցող, մթերող Տիգրան Սարգսյանը ԼՈՒՐԵՐ.com-ի թղթակցի հետ զրույցում ասաց, որ ՊԵԿ-ի գործողությունները ոչ միայն «Սպայկա»-ի աշխատողների , այլ նաև գյուղացիների համար է մեծ խնդիր։

«Նախ մոտ 3000 աշխատող մնալու է գործազուրկ, բացի դա գյուղացու համար նվազելու են գյուղմթերքի իրացման հնարավորությունները։ Մարդիկ դեռ չգիտեն, թե ինչ է գալու իրենց գլխին։ Կալանավորելով ընկերության տնօրենին՝ գլխատում են ամբողջ «Սպայկա»-ն։ Գյուղացին ներդրում է արել՝ հույսը դնելով, որ ընկերությունը կօգնի իրացնել մթերքը, բայց, եթե տնօրենը կալանավորվի իրացումը անհնար կլինի։

Մեր զրուցակիցը նշեց, որ մինչ այս պահը ակցիայի մասնակիցները որևէ արձագանք չեն ստացել և խորհուրդ տվեց բոլորին միանալ իրենց ակցիային:

«Ես աշխատող չեմ, բայց գիտակցում եմ, թե ինչ հետևանքներ է ունենալու այս ամենը։ Միայն ջերմոցներում մոտ 800 մարդ է աշխատում։ Մինչև «Սպայկայի» ստեղծումը միայն Ռուսաստան ու Վրաստան էր մթերքը արտահանվում, իսկ հիմա մինչև Արաբական Էմիրություններ։ Շատ հաճախ միջին որակի մթերքն էլ իրացվում էր, ի նպաստ գյուղացու։ Հիմա դա էլ չի լինելու»,- ասաց մթերող Տիգրան Սարգսյանը: