Եթե արագ պետտուրք չսահմանենք ներմուծվող ցեմենտի վրա, ապա մեր գործարանները կփակվեն. Հայկ Սարգսյան

ԱԺ տնտեսական հարցերի մշտական հանձնաժողովում հավանության արժանացավ գործադիրի ներկայացրած օրենսդրական նախաձեռնությունը՝ ներկրված ցեմենտի մաքսատուրքերը բարձրացնելու վերաբերյալ։

Արտադրողներին անհանգստացնում է հանգամանքը, որ պետտուրքից ազատվում է ցեմենտի պատրաստման համար օգտագործվող հիմնական հումքը՝ ներկրվող կլինկերը։

Լրագրողների հետ զրույցում «Իմ քայլից» պատգամավոր Հայկ Սարգսյանն ասաց. «Մենք ցանկանում ենք հասկանալ, թե ինչ կարծիք և ինչ ինքնարժեք են ստանում ընդհանրապես Հայաստանի երեք ցեմենտ արտադրողները և նաև՝ ինչքան է նստում ցեմենտ ներկրողների վրա։ Այս ամենը հաշվի առնելով` պետք է որոշենք, թե ինչքան պետք է լինի պետտուրքը, որպեսզի հայկական ցեմենտը կարողանա մրցակցել իրանականի հետ։ Էժան ցեմենտ ունենալու համար կարևոր նախապայման է ունենալ արտադրող, հակառակ դեպքում՝ դրսից ներկրվող ցեմենտի գինը կբարձրանա։

Օրինակ, երբ սկսեց ներկրվել իրանական ցեմենտ, տեղականի գինը 10.000 դրամով նվազեց։ Մինչև հեղափոխությունը, հայկական զեմենտի գինը 50.000 էր, իսկ հիմա 40.000։ Տնտեսական հանձնաժողովը, որոշ վերապահումներով, կողմ է քվեարկել նախաձեռնությանը, այդ թվում՝ կողմ են քվեարկել 3 ԲՀԿ-ական պատգամավորներ»։

Խոսելով նախաձեռնության հնարավոր կատարվելիք փոփոխությունների մասին՝ Սարգսյանն ասաց, որ հանդիպելու են ցեմենտ արտադրողների, շինարարաների, սպառողների, ներմուծողների հետ, որպեսզի հասկանան՝ որն է կոնսեսուսային այն լուծումը, որը շուկայում ոչ ոքի չի վնասի։

«Հնարավոր է, որ այդ ընթացքում որոշակի փոփոխություններ լինեն, օրինակ՝ պետտուրքի չափը հումքի վրա տարածվել- չտարածվելու հարցերը։ Մենք պետք է արագ կազմակերպենք այս ամենը, քանի որ եթե արագ պետտուրք չսահմանենք ներմուծվող ցեմենտի վրա, ապա մեր գործարանները կփակվեն։ Այս քայլով մենք պաշտպանում ենք տեղական արտադրողներին»,- ասում է Սարգսյանը և հավելում՝ «սահմանին իրանական ցեմենտը արժե 10.000 դրամ, ամենաէժան հայկական ցեմենտը՝ 40.000 դրամ։ Մենք ցանկանում ենք 22.000 դրամ պետտուրք սահմանել ներմուծվող ցեմենտի վրա։ Դրան կավելանան նաև մաքսային տուրքերը և մինչև Երևան ճանապարհածախսը և արդյունքում Երևանում իրանական ցեմենտի գինը կհավասարվի հայկականին։ Սա կապահովի հավասար մրցակցային դաշտ։ Արտադրողները բողոքում են, քանի որ ցանկանում են տուրք սահմանվի նաև հումքի վրա։ Հայաստանի 3 գործարաններից 2-ը աշխատում են իրենց հումքով, իսկ Երևանի գործարանը ներմուծվող հումքով։ Եթե մենք 22.000 դրամ պետտուրք սահմանենք նաև հումքի վրա, ապա Երևանի գործարանը կփակվի»:

Պատգամավորը նշեց, որ կարևորում են հավասար մրցակցային դաշտ ունենալը և Հայաստանի 3 գործարանների աշխատանքին խթանելը, որպեսզի ոչ մի գործարան չկանգնի փակման եզրին։

Ասպրամ ՓԱՐՍԱԴԱՆՅԱՆ