Գնել Սանոսյանը ԱՄԷ «ԱՔՍԵՍ» ընկերության բիզնեսի զարգացման ղեկավարի հետ քննարկեց «Հողմակայանների ներդրում» ծրագրի ընթացքը

Մայիսի 10-ին Գեղարքունիքի մարզպետ Գնել Սանոսյանն ընդունեց Արաբական Միացյալ Էմիրություններում գործող «ԱՔՍԵՍ» ընկերության բիզնեսի զարգացման ղեկավար Մարկոս Բենիտոյին՝ նրա հետ քննարկելով Գեղարքունիքի մարզում մեկնարկած «Հողմակայանների ներդրում» ծրագրի ընթացքը:

Ինչպես ներկայացրեց Մարկոս Բենիտոն՝ հողմակայանների կառուցման ծրագիրը մեկնարկել է երկուսուկես տարի առաջ, Սևանի տարածաշրջանում: Ավարտվել են հողհատկացման աշխատանքները, տեղադրվել է քամիների ուժը որոշող 1 չափիչ կայան, կազմակերպվել է հանրային մեկ լսում հողմակայանների շահագործման դեպքում բնապահպանական ազդեցությունների շուրջ:

«Մենք դրական արդյունք ենք ստացել առաջին հանրային լսումից, քանի որ բնակչությունը հիմնականում կողմ է արտահայտվում հողմակայանների կառուցման ծրագրին: Այս ամսում ծրագրել ենք հանրային երկրորդ լսումը: Մենք կատարել ենք նաև մեր կողմից արտադրվելիք էլեկտրաէներգիան ընդհանուր ցանցի հետ փոխկապակցման ուսումնասիրություն և արդեն ունենք նախնական եզրակացությունը, թե ինչ եղանակով պետք է այն կատարենք: Խնդիրը միայն սակագնի շուրջ ՀՀ կառավարության հետ ընդհանուր պայմանավորվածության հասնելու հետ է կապված: Եթե մենք կարողանանք հասնել երկուստեք ձեռնտու սակագնի սահմանմանը, ապա կարող ենք զարգացնել ու առաջ տանել սկսված ծրագիրը, որի ընդհանուր արժեքը կազմում է 250 միլիոն դոլար:

Շինարարությունը, որը նախատեսում ենք սկսել 2020 թվականի երկրորդ կեսից, պահանջելու է մինչև 400 ժամանակավոր աշխատատեղ: Հողմակայանը տարածաշրջանի համար կապահովի նաև տնտեսական զարգացման այլ հնարավորություններ»,-ներդրումային ծրագրերի ընթացքը ներկայացրեց «ԱՔՍԵՍ» ընկերության բիզնեսի զարգացման ղեկավարը: Միաժամանակ Մարկոս Բենիտոն մարզպետից խնդրեց հարց բարձրացնել կառավարության առջև՝ իրենց կողմից արտադրվելիք էլեկտրական էներգիայի վաճառքի սակագնի սահմանման շուրջ ընդհանուր պայմանավորվածություն ձեռք բերելու հարցում:

«Իսկապես վերականգնվող էներգետիկայի ոլորտում այժմ սակագների սահմանման հետ կապված քննարկումներ ու բանակցություններ են ընթանում: Դրանք կարող են տատանվել կամ փոփոխվել: Վաղը մեզ մոտ կայանալիք ներդրումային տնտեսական համաժողովը, որտեղ դուք ներկայացնելու եք ձեր կազմակերպության ներդրումային ծրագիրը, շատ հարմար առիթ է՝ խնդիրը հիմնավորված ու հասցեական ներկայացնելու համար: Մարզպետարանը ժամանակին աջակցել է ձեզ հողերի հատկացման ու զանազան այլ հարցերում, հիմա էլ պատրաստակամ է շարունակել աջակցությունը ընթացքում ծագած զանազան խնդիրներում: Որպես մարզի ղեկավար՝ ես պատրաստ եմ՝ կառավարության առջև հարց բարձրացնելու համար: Մեր մարզում վերականգնող էներգետիկայի արտադրությամբ հետաքրքրված տեղական կամ արտասահմանյան շատ ընկերությունների համեմատ ձեր ծրագիրը շատ կողմերով առաջընթաց գրանցած նախագիծ է, որը կյանքի կոչելու համար մենք մեր լիազորությունների շրջանակներում կցուցաբերենք ամենահնարավոր աջակցությունը»,-հավաստեց մարզպետ Գնել Սանոսյանը:

Կայանի կառուցումը տևելու է 18-24 ամիս, իսկ նրա շահագործումից հետո բացվելու է 40 մշտական աշխատատեղ: