Իմ ճանապարհորդելու արդյունքում Սինգապուրի ավիացիոն ակադեմիան անվճար կրթություն է մեզ տալիս. Ռևազյան

Ռուսաստանի կողմից դեպի Վրաստան թռիչքների արգելքից հետո ՀՀ-ում գործող ավիաընկերություններն ավելացրել են չվերթները, շատ նոր ուղղություններ են բացվել: Այս մասին, այսօր՝ հուլիսի 15-ին, լրագրողների հետ հանդիպման ժամանակ նշեց Քաղաքացիական ավիացիայի կոմիտեի նախագահ Տաթևիկ Ռևազյանը:

«Մենք բոլոր ավիաընկերություններին կանչեցինք մեզ մոտ, որ համոզենք, որ Հայաստանն օգտագործեն որպես տարանցիկ չվերթների տարածք, որ ուղիղ չվերթները շատանան, բայց դա էլի մեր գործառույթը չէ:

Մենք ամեն ինչ արեցինք, որ խոչընդոտներ չստեղծենք: Այդ պրոակտիվ աշխատանքի արդյունքն այն է, որ ընդհանրապես ուշացումներ չեն եղել: Ավիաընկերությունները շատացրել են չվերթները, նոր ուղղություններ են բացել: Գրեթե բոլոր ընկերությունները չվերթները շատացրել են:

Շատ ուրախացանք, որ «Armenian Air Company»-ն բացեց Մոսկվայի ուղղությամբ չվերթներ՝ շաբաթական 14 անգամ: Ռուսական ընկերությունները նույնպես ավելացրել են չվերթները, նաև լրիվ նոր ուղղություն է ավելացել՝ Երևան-Բաթումի»,- ասաց քաղավիացիայի կոմիտեի նախագահը:

Ռևազյանը նշեց, որ Սինգապուրում մասնակցել է 120 երկրների քաղավիացիաների մարմինների ղեկավարների հանդիպմանը.

«Այն, որ ես շատ եմ ճանապարհորդել, բերել է նրան, որ օրինակ՝ Սինգապուրի ավիացիոն ակադեմիան անվճար կրթություն է մեզ տրամադրում, Չինաստանի քաղավիացիան անվճար կրթություն է տրամադրում: Միաժամանակ, ես կարողացել եմ ներգրավել շատ ուժեղ մասնագետների: Սինգապուրի քաղավիացիան պատվիրակություն կուղարկի Հայաստան և կոնկրետ օդանավակայանի անվտանգությամբ կզբաղվի, այսինքն՝ կհասկանանք՝ ինչ խնդիրներ ունենք, ոնց կարող ենք դրանք լուծել, այն էլ՝ անվճար»,- ասաց Ռևազյանը: