Գինեգործը մթերման համար 10 տոկոսով ավելի քիչ, սակայն բարձր որակի խաղողի բերք է ակնկալում

Գինու ազգային կենտրոնի նախագահ Ավագ Հարությունյանի դիտարկումներով գինու և կոնյակի համար խաղողի բերքն այս տարի կլինի 10 տոկոսով ավելի պակաս, սակայն փոխարենը՝ շատ բարձր որակով:

Հարությունյանը նման տեսակետ հայտնեց լրագրողների հետ զրույցում:

«Շատ լավ տարի է, շատ բարձր որակի բերք ու գինի է սպասվում: Իմ դիտարկումներով, բերքը 10 տոկոսով պակաս է լինելու, սակայն փոխարենը՝ բարձր որակի: Վայոց ձորում բերքը շատ քիչ է: Մարզը տալիս է խաղողագործական ընդհանուր տնտեսության 1-2 տոկոսը, սակայն կարմիր խաղողի՝ 90 տոկոսը: Այսինքն, կարմիր խաղողից  բացի, մենք ունենք նորմալ քանակի բերք»,-վստահեցրեց Ավագյանը:

Նրա դիտարկմամբ՝ այս տարի կմթերվի 105-110 հազար տոննա խաղող: Ավագյանը խաղողի մթերման հետ կապված նախորդ տարվանից սկսած դրական միտում է նկատել: Նրա խոսքով՝ նախորդ տարի գնման գների առումով կոնյակի գործարանի և մյուս գործարանների միջև հավասար իրավիճակ է եղել: Այս տարի մյուս գործարանները առաջարկում են 5 դրամ ավելի, քան կոնյակի գործարանը:

Ավագյանի տվյալներով՝ կան գործարաններ, որոնք կոնյակի խաղողի համար սահմանել են արդեն 155-160 դրամ, գինու սպիտակ խաղողի համար՝ 200 դրամ, կարմիր խաղողի համար՝ 205-210 : Ավագյանը կարծում է, որ դա կբարձրանա ևս 15-20 դրամով:

Գինու ազգային կենտրոնի նախագահն այս տարի նաև կոնյակի և գինու արտահանման աճ է նկատել և կարծում է, որ դա շարունակական կլինի: