Ինչքան և ինչ տեսակի օգնություն է տրամադրվել նախարարություններին՝ Արցախ ուղարկելու համար. 168.am

168.am-ը հարցումներ էր ուղարկել Առողջապահության, Էկոնոմիկայի և Արտակարգ իրավիճակների նախարարություններին՝ պարզելու համար, թե պատերազմի ընթացքում և դրան հաջորդած օրերին ի՞նչ քանակությամբ և ի՞նչ տեսակի օգնություն են ստացել՝ Արցախի Հանրապետություն ուղարկելու համար: Մեր հարցմանն ի պատասխան՝ ԱԻՆ-ից հայտնում են, որ 2020թ. սեպտեմբերի 27-ից սկսած՝ որպես հումանիտար օգնություն ԱԻՆ Փրկարար ծառայության կենտրոնական պահեստ է մուտքագրվել սննդամթերք, հագուստ, տնտեսական և հիգիենայի պարագաներ, դեղորայք, ծխախոտ, ջրեղեն:

«2020թ.-ի սեպտեմբերի 27-ից սկսած ԱԻՆ Փրկարար ծառայության կենտրոնական պահեստ է մուտքագրվել՝ 20.360 պարկ, 104 փաթեթ, 9547 հատ, 58.365 արկղ, 26.984 կգ սննդամթերք, 8672 պարկ, 594 փաթեթ, 18.827 հատ, 18.921 արկղ, 3056 կգ հագուստ, 882 պարկ, 1 փաթեթ, 14.991 հատ, 10.390 արկղ, 11.800 կգ տնտեսական և հիգիենայի պարագաներ, 443 պարկ, 1 փաթեթ, 1464 հատ, 2128 արկղ, 3 լիտր դեղորայք, 4 պարկ, 1 փաթեթ, 629 հատ, 3361 արկղ ծխախոտ, 7482 հատ, 27.136 արկղ, 1739 լիտր ջրեղեն, 2192 պարկ, 6 փաթեթ, 5432 հատ, 4044 արկղ, 3540 կգ այլ կենցաղային ապրանքներ, որոնք ուղարկվել են ինչպես Արցախի Հանրապետություն, այնպես էլ Հայաստանի Հանրապետության մարզեր և Երևան: Հումանիտար օգնության բաշխման ընթացքում առաջնահերթությունը տրվել է Արցախի Հանրապետությանը, այնուհետև ՀՀ այն համայնքներին, որտեղ համեմատաբար ավելի մեծ թվով Արցախի քաղաքացիներ կան»,- գրված է պատասխանում:

ԱԻՆ-ից նաև հայտնում են, որ հումանիտար օգնության հավաքագրումն իրականացվել է և՛ ՀՀ քաղաքացիների, և՛ ռեզիդենտ կազմակերպությունների, և՛ արտերկրի հայության կողմից կազմակերպված բեռնափոխադրումների միջոցով: Իսկ ստացված օգնության ո՞ր մասն է ուղարկվել Արցախ:

«Արցախի Հանրապետություն է ուղարկվել 380 բեռնատարներից 84-ը (12-28 տոննա բեռնատարողությամբ)՝ բեռնաբարձված տարատեսակ ապրանքներով, հիմնականում սննդամթերք»,- գրված է պատասխանում:

Ի պատասխան մեր հարցին, թե ի՞նչ մեխանիզմով է վերահսկվում ստացված օգնությունը հասցեատերերին փոխանցելու և նպատակին ծառայեցնելու գործընթացը, ԱԻՆ-ից պատասխանել են.

«Արտակարգ իրավիճակների նախարարության կողմից հումանիտար օգնությունն ուղարկվում և համապատասխան արձանագրությամբ հանձնվում է բացառապես Արցախի Հանրապետությունում, Հայաստանի Հանրապետության մարզերում և Երևանում լիազոր մարմնի կողմից սահմանված պատասխանատուներին, որոնց կողմից իրականացված բաշխման գործընթացի նկատմամբ Արտակարգ իրավիճակների նախարարությունը վերահսկման որևէ պարտավորություն չունի»:

Էկոնոմիկայի նախարարությունից մեր հարցմանն ի պատասխան՝ հայտնել են, որ 2020թ. սեպտեմբերի 27-ին սկսված պատերազմի ընթացքում և դրան հաջորդած օրերին ՀՀ Էկոնոմիկայի նախարարությունն Արցախի Հանրապետություն ուղարկելու համար անհատներից և կազմակերպություններից օգնություն չի ստացել: Առողջապահության նախարարությունից մեր հարցմանը դեռ չեն պատասխանել: