Նախատեսվում է, որ պետությունը երեք տարի կվճարի արցախցիների հիպոթեքային վարկերը

Արցախում նախատեսվող սոցիալական ծրագրերի շրջանակում 3 տարում բոլոր անօթևաններին պետք է ապահովեն բնակարանային պայմաններով, ինչպես նաև քաղաքացիների փոխարեն պետությունը վճարելու է հիփոթեքային վարկերի գումարներն ու դրանց տոկոսները:

«Մենք պետք է առաջին հերթին կարճ ժամանակահատվածում լուծենք մեր անօթևան քաղաքացիների կացարանների ու նվազագույն սոցիալական պայմանների ապահովման խնդիրները: Դրան զուգահեռ ու հատկապես դրանից հետո խնդիր ենք ունենալու բարենպաստ պայմաններ երաշխավորելու մեր բոլոր քաղաքացիների կյանքի որակի բարձրացման ու հանրապետության սոցիալ-տնտեսական զարգացման համար: Նախատեսում ենք մեկնարկել մի շարք ծրագրեր: Մասնավորապես՝ Հայաստանի Հանրապետության հետ համատեղ կատարել առավելագույնը՝  բոլոր գերիներին տուն վերադարձնելու ուղղությամբ, ինչպես նաև ակտիվորեն շարունակել զոհվածների մարմինների ու անհետ կորածների որոնողական աշխատանքները:  Նախատեսում ենք կարճ ժամկետում կարգավորել անօթևան քաղաքացիների ժամանակավոր կացարանների խնդիրը՝ թե՛ տարբեր շինություններում կենտրոնացված տեղավորման, թե՛ բնակվարձի պատշաճ փոխհատուցման, թե՛ արագ բնակարանաշինության և հնարավոր այլ ծրագրերի միջոցով:

Զգալի աջակցություն ենք ցուցաբերելու  ֆիզիկական ու իրավաբանական անձանց վարկերի սպասարկման մասով:

Էականորեն պետք է մեծացնենք շինանյութերի հատկացման ծրագիրը՝ գյուղերի բնակֆոնդի պայմանների բարելավման նպատակով: Նախատեսվում է առնվազն վեց ամիս շարունակ գործազուրկ քաղաքացիներին հատկացնել ամսական 68 հազար դրամ սոցիալական աջակցություն: Առնվազն մեկ տարի շարունակ սուբսիդավորելու ենք  գազի, էլեկտրաէներգիայի, կապի ֆիքսված ծավալների սպառումը և այլ կոմունալ ծախսերը՝ ճկուն հարաբերակցությամբ՝ ըստ սպառողների նախընտրության ու կարիքների, իսկ հայտարարված սահմանաչափերը կբարձրացվեն: Նախատեսում ենք հայտարարել հարկային համաներում և սահմանել հարկային լայն արտոնություններ: Գույքագրվելու են պատերազմի հետևանքով արձանագրված նյութական վնասները՝ հետագայում քննարկելու համար փոխհատուցումներ տրամադրելու հնարավորությունները»,-մասնավորապես նշել է նախագահ Հարությունյանը՝ հավելելով, որ   առկա ճգնաժամից դուրս գալուն միտված կարճաժամկետ ծրագրերից հետո մշակելու և իրագործելու են ավելի երկարաժամկետ զարգացման ծրագրեր:

Ըստ Արցախի նախագահի՝ այդ  ծրագրերի կյանքի կոչումը հնարավոր է լինելու ոչ միայն Արցախի Հանրապետության միջոցներով, այլ նաև Հայաստանի Հանրապետության, համայն հայության, Ռուսաստանի Դաշնության գործուն աջակցության շնորհիվ: