Մինսկում Ryanair-ի ինքնաթիռի վայրէջք կատարելու որոշումը կանխամտածված հատուկ գործողություն էր, որի համար պատասխանատու է Լուկաշենկոն․ Ուկրաինայի ԱԽՔ

Ուկրաինայի ազգային անվտանգության և պաշտպանության խորհրդի քարտուղար Ալեքսեյ Դանիլովը կարծում է, որ Ryanair ինքնաթիռի՝ Մինսկում վայրէջք կատարելու որոշումը «կանխամտածված հատուկ գործողություն» էր, որի համար լիովին պատասխանատու է Բելառուսի նախագահ Ալեքսանդր Լուկաշենկոն: «Մայիսի 23-ին Մինսկում բելառուսական ընդդիմադիր լրագրող Ռոման Պրոտասևիչի կալանքը բաց մարտահրավեր է ողջ ժողովրդավարական աշխարհի համար, միջազգային նորմերի և կանոնների լկտի անտեսում: Բելառուսի իշխանությունները խոսքի ազատությունը ճնշելու իրենց փորձերում անցան մեկ այլ «կարմիր գիծ»։ Ryanair ուղևորատար ինքնաթիռը Մինսկի օդանավակայանում վայրէջք կատարելու որոշումն, անկասկած, պլանավորված և մտածված հատուկ գործողություն էր, որի համար լիովին պատասխանատու է Ալեքսանդր Լուկաշենկոն», - գրել է Դանիլովը Facebook-ի իր էջում: Նա ավելացրել է, որ Ուկրաինան մտահոգությամբ է հետեւում Բելառուսում իրավիճակի զարգացմանը։