Ժողովուրդը Փաշինյանին ներեց թե՛ պարտությունը, թե՛ նվաստացումը. Коммерсантъ

Հայաստանում խորհրդարանական ընտրությունների հիմնական արդյունքն այն է, որ վարչապետ Նիկոլ Փաշինյանը պահպանի իշխանությունը: «Կոմերսանտ»-ի թղթակից Մաքսիմ Յուսինը մտորում է այն մասին, թե դա ինչ հետեւանքներ կարող է ունենալ երկրի, տարածաշրջանի եւ ռուս-հայկական հարաբերությունների համար:

«Հայաստանում անցկացված ընտրությունների արդյունքները, որոնք ավարտվեցին վարչապետ Նիկոլ Փաշինյանի եւ նրա «Քաղաքացիական պայմանագիր» կուսակցության անվերապահ հաղթանակով, Մոսկվայում անակնկալի բերեցին շատերին: Չէ որ այդ մարդիկ առաջնորդվում էին կեղծ վարկանիշներով եւ կեղծ-հարցումներով, որոնք հաջողություն էին կանխատեսում նախկին նախագահ Ռոբերտ Քոչարյանի կողմնակիցներին: Հիմա պարզ է, թե որն է այդ հարցումների գինը. փաստացի դա նախընտրական արշավի մի մասն էր, իսկ սոցիոլոգների քողի տակ աշխատում էին փիառի մասնագետներ՝ անճանաչելիորեն աղավաղելով իրական պատկերը:

Թվում է՝ Հայաստանում իրավիճակի վերաբերյալ մեր շատ հայրենակիցների տեսակետը նույնպես խիստ աղավաղված է: Ինչպիսի՞ն էր պատկերն կողքից դիտորդի համար, ով ներգրավված չէ ներքին հայկական գործերում: Փաշինյանը լուզեր քաղաքական գործիչ է, հայերի պատմության մեջ ամենանվաստացուցիչ եւ ցնցող պարտություններից մեկի մեղավորն ու խորհրդանիշը: Հենց ցնցող՝ այն հաղթարշավի, ազգային ոգու վերելքի ֆոնին, որը կար 1990-ականներին Ադրբեջանի հետ նախորդ պատերազմում Հայաստանի հաղթանակից հետո: Եվ ահա այսպիսի ջախջախում բառացիորեն բոլոր հոդվածներով, առանց շանսերի: Եվ դրա համար պատասխան տրամաբանորեն պետք է տա այն առաջնորդը, որը պատերազմի նախօրեին անպատասխանատու եւ անխոհեմ քաղաքականություն էր վարում՝ միեւնույն ժամանակ սադրելով Բաքվին եւ մարտահրավեր նետելով Մոսկվային՝ միակ հավանական դաշնակիցին, որն ընդունակ է կանխել հակամարտությունը սաղմնային փուլում: Փաշինյանն ամեն ինչ արեց, որպեսզի Կրեմլը նման ցանկություն չունենա, եւ ահա աղետալի արդյունքը: Բայց պարադոքսն այն է, որ, ինչպես պարզվեց, Հայաստանի ներսից իրավիճակն այլ է: Այդ մարդիկ մեղադրվում են կոռուպցիայի, բռնապետական ​​վարքի մեջ, որից հասարակությունը հոգնել է»,- գրում է «Կոմերսանտ»-ի թղթակիցը:

Ըստ Յուսինի` հայկական ընդդիմության խնդիրն այն է, որ Փաշինյանի դեմ պայքարելիս այն չկարողացավ գտնել նոր դեմքեր: Հասարակությանը պետք չեն նրանք, ովքեր ընտրությունների ժամանակ ընդդիմության խորհրդանիշներն էին: Այս պարագայում նրա համար Փաշինյանը դարձավ չարյաց փոքրագույնը: 

«Հայերը պատրաստ են ներել նրան ինչպես պարտության, այնպես էլ նվաստացման համար: Եվ սա ժողովրդի ընտրությունն է, որքան էլ դա անտրամաբանական, ծիծաղելի, մազոխիստական թվա կողքից: Երկրի հարևանները՝  ինչպես գործընկերները, այնպես էլ թշնամիները, ստիպված կլինեն հաշվի նստել այս ընտրության հետ: Իսկ հայ ժողովրդին կարելի է մեկ բան խորհուրդ տալ` հնարավորինս շուտ ազատվել պատրանքներից: Նվաստացումները, զիջումները, փոխզիջումները չեն վերջանա: Թերևս դրանք դեռ նոր են սկսվում. սա է այն բոլոր պետությունների և ժողովուրդների ճակատագիրը, որոնք պարտվել են պատերազմում: Չկան ո՛չ բացառություններ, ո՛չ էլ հրաշքներ: Վաղ, թե ուշ, ստիպված կլինեն զիջումների գնալ Բաքվի հետ ինչպես սահմանային հարցերում, այնպես էլ տրանսպորտային միջանցքի երկայնքով, որը պետք է անցնի Հայաստանով`  Նախիջևանը կապելով մնացած Ադրբեջանի հետ: Սրանք հենց այն զիջումներն են, որոնց Փաշինյանը համաձայնեց ռազմական գործողությունների դադարեցման մասին պայմանագրեր կնքելիս: Տհաճ է, զզվելի, նվաստացուցիչ, բայց այդ կետերին պետք է հետևել: Եվ սրա համար, թերևս առանց գիտակցելու,  քվեարկեցին այն մարդիկ, որոնք Փաշինյանին հաղթանակ պարգևեցին ընտրություններում»,-եզրափակում է Յուսինը: