Հայիթիի սպանված նախագահի երեխաները մեկնել են երկրից

Իր բնակավայրի վրա զինված հարձակման արդյունքում զոհված Հայիթիի նախագահ Ժովենել Մոիզի երեխաները մեկնել են երկրից, հայտնում է տեղական Juno7 պորտալը: Այլ մանրամասներ պորտալը չի ​​հաղորդում: Ավելի վաղ հարևան Դոմինիկյան Հանրապետությունում Հաիթիի դեսպան Սմիթ Օգոստինը հայտարարել էր, որ Մոիզի երեխաները «ապահով վայրերում» են գտնվում՝ պաշտպանության տակ:
Հարձակման արդյունքում մահացած նախագահի կինը՝ Մարտինա Մոիզը, ուղարկվել է Մայամի՝ բուժման: Տեղական 10 հեռուստաալիքի փոխանցմամբ՝ Հայիթիի առաջին տիկինն արդեն Հարավային Ֆլորիդայում է: Ըստ հեռուստաալիքի՝ Մարտինա Մոիզը հրազենային վնասվածքներ է ստացել ձեռքի, ազդրի ու որովայնի շրջանում:

Ինչպես հայտնի է, Հաիթիի նախագահը մահացու վիրավորում էր ստացել չորեքշաբթի գիշերը՝ իր նստավայրի վրա հարձակման արդյունքում: Երկրի վարչապետ Կլոդ Ժոզեֆի գրասենյակի փոխանցմամբ՝ սպանությունը կատարել են օտարերկրյա վարձկանները: Երկրում ռազմական դրություն է մտցվել 15 օր ժամկետով: Ավելի ուշ, ոստիկանության պետը հայտնել է, որ հարձակման ենթադրյալ մասնակիցներից չորսը սպանվել են, իսկ երկուսը բերման են ենթարկվել: