ՌԴ-ն պատրաստ Է աջակցելու Հայաստանի և Ադրբեջանի միջև սահմանագծման աշխատանքի գործարկմանը

Ռուսաստանը պատրաստ է խորհրդատվական աջակցություն ցույց տալու Ադրբեջանի եւ Հայաստանի միջեւ սահմանագծման աշխատանքի գործարկմանը՝ դրա հետագա սահմանազատմամբ՝ երկրների միջեւ հակամարության շուտափույթ լուծման նպատակով: Հուլիսի 9-ին կայացած ճեպազրույցում այդ մասին հայտարարել է ՌԴ-ի արտգործնախարարության պաշտոնական ներկայացուցիչ Մարիա Զախարովան:

«Մենք բազմիցս ընդգծել ենք, որ որպես սույն խնդրի կայուն եւ երկարաժամկետ լուծում տեսնում ենք Ադրբեջանի եւ Հայաստանի միջեւ սահմանագծման աշխատանքի շուտափույթ գործարկումը՝ դրա հետագա սահմանազատմամբ: Մենք պատրաստ ենք ցույց տալու անհրաժեշտ խորհրդատվական աջակցություն, եւ ներկայումս շարունակվում են շփումներն արտաքին քաղաքական եւ պաշտպանական գերատեսչությունների, ինչպես նաեւ սահմանապահ ծառայությունների գծով, այդ թվում՝ լարվածության ապաէսկալացիայի նպատակով»,- ասել է նա:

Դիվանագետի խոսքով՝ ՌԴ-ն չի կարծում, թե երկու երկրների սահմանին ստեղծված իրադրությունը կապված է Լեռնային Ղարաբաղի հիմնախնդրի կարգավորման հետ, այլ ավելի շուտ սահմանի իրավական ձեւակերպման բացակայության հետեւանք է: «Մենք ելնում ենք այն բանից, որ հայ-ադրբեջանական սահմանի առանձին շրջաններում իրադրությունն ուղղակիորեն կապված չէ Լեռնային Ղարաբաղի հիմնախդրի կարգավորման հետ եւ սահմանի իրավական ձեւակերպման բացակայության հետեւանք է: Ընդհանուր ֆոննն, անտարակույս, սաստկացնում է կողմերի փոխադարձ վստահության դեֆիցիտը, դա իրոք այդպես է»,- հավելել է Զախարովան: