Աֆղանստանի փոխնախագահը նշել է կառավարության անկման պատճառները

Վաշինգտոնի կողմից Քաբուլի վրա ճնշումը, Կատարի բանակցություններում «Թալիբանի» փաստացի ճանաչումը և կառավարությունում արդի տեղեկատվության բացակայությունը հանգեցրին Աշրաֆ Ղանիի վարչակազմի տապալմանը։ Այս մասին հայտարարել է փոխնախագահ Ամրուլլահ Սալեհը՝ նախագահի պաշտոնակատարը։
«Հասկանալի է, որ թալիբները երբեք ճնշումների չեն ենթարկվել։ Նրանք օգտագործել են Պակիստանը՝ որպես հենակետ: Ամբողջ Պակիստանը ծառայել է թալիբներին: Հետևաբար, Աֆղանստանում արևմտյան դաշնակիցների դեմ ահաբեկչությանը և ապստամբությանը հովանավորող միջուկային պետության հարցը երբեք չի քննարկվել», - ասել է Սալեհը News18-ին տված հեռախոսազրույցում: Նա նաև նշել է, որ Դոհայում ընթացող միջաֆղանական բանակցությունները իրականում «օրինականացրել են թալիբների գործողությունները, որոնք հավատարիմ չեն մնացել իրենց խոսքին»:

Նա նաև կարծիք է հայտնել, որ կառավարությունում «կային մարդիկ, ովքեր չգիտեին իրավիճակի մասին»:
«Այնուամենայնիվ, մենք չենք կարող սահմանափակվել այս պատճառներով, քանի որ կան տարբեր այլ խնդիրներ, որոնք հանգեցրեցին այս ողբերգությանը: Եզրակացությունն այն է, որ ՆԱՏՕ-ն այլևս չկա, ամերիկացի զինվորականները հեռացան, բայց աֆղան ժողովուրդը չհեռացավ, նրանք չկարողացան: Երկիրը ողբերգության մեջ հայտնվեց, և ահաբեկչական խմբավորումները ներխուժեցին Աֆղանստան», - եզրափակել է Սալեհը: