Կորոնավիրուսը չի ստեղծվել՝ որպես կենսաբանական զենք․ ԱՄՆ հետախուզությունը զեկույց է հրապարակել

ԱՄՆ հետախուզությունը եկել է այն եզրակացության, որ կորոնավիրուսը չի ստեղծվել՝ որպես կենսաբանական զենք, ասված է վարակի ծագման մասին զեկույցում, որը պատրաստվել է ԱՄՆ նախագահ Ջո Բայդենի համար:

Հետաքննությունը տևել է 90 օր, և հետախուզական համայնքը կարողացել է համաձայնության գալ մի շարք առանցքային կետերի շուրջ:

«Գործակալությունների մեծ մասը նույնպես քիչ հավանական են համարում, որ SARS-CoV-2-ը գենետիկորեն մշակված է»,-ասվում է ԱՄՆ ազգային հետախուզության տնօրենի կայքում տեղադրված փաստաթղթի չդասակարգված հատվածում:

Նշվում է, որ հետաքննության մասնակիցները չեն կարողացել համաձայնության գալ։ Հավանական է համարվում կորոնավիրուսի ծագման երկու վարկած՝ «վարակված կենդանու հետ բնական շփում և միջադեպ, որը տեղի է ունեցել լաբորատորիայում»:

Բացի այդ՝ հետախուզական համայնքը կարծում է, որ Չինաստանի իշխանությունները, նախքան բռնկումը, տեղյակ չէին կորոնավիրուսի մասին:

«Չինաստանի համագործակցությունը, ամենայն հավանականությամբ, անհրաժեշտ կլինի COVID-19-ի ծագումը վերջնական տեսքի բերելու համար: Այնուամենայնիվ, Պեկինը շարունակում է խոչընդոտել գլոբալ հետաքննությանը, դիմադրել տեղեկատվության փոխանակմանը և մեղադրել այլ երկրներին՝ ներառյալ ԱՄՆ-ին, որ միջազգային հանրությունը դա օգտագործում է Չինաստանի վրա քաղաքական ճնշում գործադրելու համար», - ասվում է զեկույցում:

«Այս համաճարակի ծագման վերաբերյալ քննադատական ​​տեղեկատվությունը հասանելի է Չինաստանի Ժողովրդական Հանրապետությունում, սակայն ի սկզբանե Չինաստանի կառավարության պաշտոնյաներն աշխատել են միջազգային քննիչների և համաշխարհային բժշկական հանրության անդամների մուտքը երկիր մերժելու համար», - ասել է ԱՄՆ նախագահ Ջո Բայդենը: Նա շեշտել է, որ «չի հանդարտվի», քանի դեռ պատասխաններ չի ստացել: