Աֆղանստանի նոր կառավարությունում կանայք չեն լինի․ «Թալիբան» շարժում

Աֆղանստանի նոր կառավարությունը հնարավորինս շուտ կձևավորվի, սակայն այնտեղ կին նախարարներ չեն լինի, ասել է «Թալիբան» շարժման ներկայացուցիչ Զաբիուլլահ Մոջահիդը:

«Մենք հնարավորինս շուտ կձևավորենք ազգային միասնության կառավարություն: Մենք մտադիր ենք ստեղծել կոմպակտ կառավարություն՝ նախկին նախարարությունների կեսի չափով», - ասել է նա իտալական la Repubblica թերթին տված հարցազրույցում:

Նրա խոսքով՝ «մեծ հարցականի տակ» շարունակում է մնալ Փանջշիրի շրջանի բնակչությունը, որի հետ երկխոսությունը արդյունք չի տալիս: «Խաղաղության գործընթացը, որի վրա մենք հույս ունեինք, ավելի է բարդանում: Մենք պահանջել ենք, որ Փանջշիրի զորքերը հանձնվեն, հակառակ դեպքում՝ նրանք կջախջախվեն», - ասել է թալիբների ներկայացուցիչը:

Պատասխանելով այն հարցին, թե արդյո՞ք կանայք կարող են անդամակցել երկրի նոր կառավարությանը, Մուջահիդը պատասխանել է․ «Օրինակ՝ դատական ​​համակարգում՝ որպես օգնականներ, կարող են: Բացի այդ՝ աֆղան կանայք կկարողանան սովորել համալսարաններում»,֊նշել է Մոջահիդը:

Խոսելով Աֆղանստանի նոր իշխանությունների միջազգային կապերի մասին՝ «Թալիբանի» խոսնակն ասել է, որ Չինաստանն իր համար հիմնական գործընկեր է, որը պատրաստ է ներդրումներ կատարել և վերականգնել երկիրը»:

«Չինաստանը մեր դարպասն է դեպի աշխարհի շուկաներ», - հավելել է Մուջահիդը:

Նա հերքե է նաև Ռուսաստանի հետ հարաբերությունների սառեցման մասին կարծիքը, թեև ասել է, որ «նման տպավորություն կարող է ստեղծվել»: