Թուրքիան հայտնել է՝ երբ կճանաչի «Թալիբանի» կառավարությունը
Համաշխարհային Մամուլ
Թուրքիան չի շտապի ճանաչել Աֆղանստանում «Թալիբանի» կառավարությունը։ Այն պետք է ներառի տարբեր քաղաքական ուժեր, հայտարարել է Թուրքիայի արտգործնախարար Մևլութ Չավուշօղլուն:
«Կճանաչի՞ արդյոք Թուրքիան «Թալիբանին»: Եկեք հապճեպ որոշումներ չկայացնենք: Մենք պետք է ստեղծենք կառավարություն, որը կարող է հաղթահարել ճգնաժամը, կանխել քաղաքացիական պատերազմը: Սա պահանջում է ներառական կառավարություն՝ բոլոր քաղաքական ուժերի և հատվածների մասնակցությամբ՝ ներառյալ բնակչությունը՝ չմոռանալով կանանց մասին: Եվ որպեսզի ամբողջ աշխարհը ճանաչի «Թալիբանին», անհրաժեշտ է ապահովել նման կառավարության ստեղծումը», - ասել է Չավուշօղլուն NTV հեռուստաալիքի եթերում:
Նրա խոսքով՝ «Աֆղանստանի՝ աշխարհին ներկայացված կառավարության անդամների թվում են միայն թալիբների ներկայացուցիչները»: «Մենք չենք պատրաստվում նրանց համար կառավարություն ձևավորել, բայց մեր գաղափարներն ուղիղ փոխանցում ենք թալիբներին: Մենք կդիտարկենք և կգործենք իրավիճակին համապատասխան, մինչդեռ այս հարցում հստակ դիրքորոշում չունենք», - հավելել է Չավուշօղլուն:
Նա նշել է, որ Թուրքիան դեռ թալիբներից հրավեր չի ստացել՝ մասնակցելու Աֆղանստանի նոր կառավարության կազմը հայտարարելու միջոցառմանը:
Ամենադիտված 
Մնաս բարյավ. Րաֆֆի Հովհաննիսյան
