ՀԱՊԿ-ը կստեղծի Կենսանվտանգության համակարգող խորհուրդ

ՀԱՊԿ անդամ երկրների Անվտանգության խորհուրդների քարտուղարները որոշում են կայացրել ստեղծել ՀԱՊԿ անդամ պետությունների լիազոր մարմինների համակարգող խորհուրդ կենսաբանական անվտանգության հարցերով, հայտնում է ՌԴ Անվտանգության խորհրդի գրասենյակի մամուլի ծառայությունը:

«Ստեղծվող համակարգող խորհուրդը կվերլուծի ՀԱՊԿ անդամ երկրներում կենսաբանական անվտանգության ապահովման հետ կապված իրավիճակը, կկազմակերպի փորձի փոխանակում, կներկայացնի առաջարկություններ այս ոլորտում համակարգված գործունեության ձևավորման և զարգացման համար», - ասվում է հաղորդագրության մեջ:

Այս որոշումը կայացրել են Դուշանբեում ՀԱՊԿ անդամ երկրների անվտանգության խորհուրդների քարտուղարները: Հանդիպմանը մասնակցել է Ռուսաստանի Անվտանգության խորհրդի քարտուղար Նիկոլայ Պատրուշեւը:

Նոր խորհրդի գործառույթները կլինեն, մասնավորապես, ՀԱՊԿ անդամ պետությունների համատեղ գործնական միջոցառումների վերաբերյալ առաջարկությունների մշակումը` կանխելու ազգային, տարածաշրջանային և միջազգային անվտանգության սպառնալիքները` կապված կենսաբանական վտանգավոր գործոնների ազդեցության հետ: Բացի այդ` նախատեսվում է աշխատել ՀԱՊԿ շրջանակներում համագործակցության օրենսդրական դաշտի կատարելագործման և լիազորված մարմինների կառուցվածքային ստորաբաժանումների, ինչպես նաև կենսաբանական անվտանգության ոլորտում մասնագիտացված հաստատությունների և կազմակերպությունների միջև փոխգործակցության կազմակերպման ուղղությամբ: