Թրամփը հերքել է ԶԼՄ-ների այն տեղեկությունները, թե ինքը ծրագրել է հարվածել Չինաստանին

Միացյալ Նահանգների նախկին նախագահ Դոնալդ Թրամփը հերքել է ավելի վաղ հրապարակված լրատվամիջոցների այն տեղեկությունները, թե ինքը ռազմական գործողություններ է ծրագրում Չինաստանի դեմ:

Ավելի վաղ Washington Post թերթը հրապարակել էր հատվածներ հայտնի լրագրող Բոբ Վուդվորթի նոր գրքից: Այն պնդում է, որ Թրամփի նախագահության վերջին ամիսներին ԱՄՆ շտաբի պետերի միացյալ կոմիտեի նախագահ Մարկ Միլին երկու անգամ զանգահարել է իր չինացի գործընկերոջը՝ փարատելու Պեկինի մտավախությունը ամերիկյան անակնկալ հարվածի հավանականության վերաբերյալ:

Newsmax հեռուստաալիքի եթերում պետության նախկին ղեկավարն այս հայտարարությունները «ծիծաղելի» է անվանել:
«Ես երբեք մտադրություն չեմ ունեցել հարձակվելու Չինաստանի վրա», - ասել է Թրամփը:

Թրամփն առաջարկել է, որ նման հայտարարություններով ամերիկացի բարձրաստիճան զինվորականը «փորձում է իրավիճակից դուրս գալ Աֆղանստանից իր ոչ կոմպետենտ (ամերիկյան զորքերի) դուրսբերման կապակցությամբ»:

«Ասել, որ պատրաստվում եմ հարձակվել Չինաստանի վրա, ամենազավեշտալի բանն է, որ ես երբևէ լսել եմ, և դա բոլորը գիտեն», - ասել է ԱՄՆ նախկին նախագահը:

Վուդվորդը, Washington Post-ի լրագրող Ռոբերտ Կոստայի հետ համատեղ, ուսումնասիրում է 2020 թվականի նախագահական ընտրությունները, Կապիտոլիումի գրավումը և Ջո Բայդենի երդմնակալության արարողությունը: Նրանք հարցազրույց են վերցրել ավելի քան 200 աղբյուրներից, որոնց թվում չկան ԱՄՆ նախկին կամ ներկա նախագահներ: Երեքշաբթի օրը Սպիտակ տունը հրաժարվել է մեկնաբանել այդ գրքից հատվածները: