Օրենքով գող Տոլիկ Նոգինսկին բերման է ենթարկվել. նրա մոտ թմրանյութ է հայտնաբերվել

Օրենքով գող Տոլիկ Դագլիևը, որը քրեական շրջանակներում հայտնի է՝ որպես Տոլիկ Նոգինսկի, չորեքշաբթի օրը՝ սեպտեմբերի 15-ին, ձերբակալվել է Ստավրոպոլի երկրամասի Միներալնիե Վոդիում, հաղորդում է Prime Crime լրատվական գործակալությունը:

Գործակալության տվյալներով՝ 37-ամյա Նոգինսկուն բերման են ենթարկել՝ հերոին կրելու կասկածանքով: Նրա դեմ քրեական գործ է հարուցվել ՌԴ քրեական օրենսգրքի 228-րդ հոդվածի 2-րդ մասով («Թմրամիջոցների անօրինական պահում»):

Հարցաքննության ժամանակ Տոլիկ Նոգինսկին ասել է, որ ինքը եկել է Միներալնիյե Վոդի բուժման նպատակով, և երբ նրան հարցրել են «օրենքով գող» լինելու մասին, նա պատասխանել է, որ «նրանց հետ կապ չունի»:

Նոգինսկին երկու անգամ դատապարտվել է: Առաջին անգամ նա 2015 թվականին պայմանական պատիժ է ստացել ապօրինի զենք պահելու համար, երկրորդ անգամ՝ 2017 թվականին: Նա դատապարտվել է երեք տարի ազատազրկման ընդհանուր ռեժիմի գաղութում՝ թմրանյութեր կրելու համար: