Ջեֆ Բեզոսի հիմնադրամը խոստացել է 2 միլիարդ դոլար հատկացնել կլիմայի փոփոխության դեմ պայքարին

Ջեֆ Բեզոսի Earth Fund հիմնադրամը 2 միլիարդ դոլար է խոստացել կլիմայի փոփոխության դեմ պայքարի համար՝ վերականգնելու բնական լանդշաֆտները և փոխակերպելու գյուղատնտեսական համակարգերը, հաղորդում է Associated Press-ը:

«Մենք պետք է պահպանենք այն, ինչ ունենք, վերականգնենք այն, ինչ կորցրել ենք և աճեցնենք այն, ինչ անհրաժեշտ է բնության հետ ներդաշնակ լինելու համար», - ասվում է Բեզոսի հայտարարության մեջ:

Հիմնադրամի ծրագրերի համաձայն՝ 1 միլիարդ դոլար կտրամադրվի ծառերի աճեցմանը բնական լանդշաֆտների վերականգնման համար՝ հիմնականում ԱՄՆ-ում և Աֆրիկայում: Եվս 1 միլիարդ դոլար կհատկացվի գյուղատնտեսական համակարգերի վերափոխման համար՝ «փորձելու բարձրացնել բերքատվությունը, նվազեցնել սննդի թափոնները և խթանել բուսական սննդակարգը»:

Բեզոսի հայտարարությունը հնչել է կլիմայի գագաթնաժողովի ֆոնին։ Այն մեկնարկել է հոկտեմբերի 31-ին՝ Գլազգոյում, և կգործի մինչև նոյեմբերի 12-ը: Ակնկալվում է, որ ներկա կլինեն մոտ 200 երկրների ներկայացուցիչներ: