Սահակաշվիլին դիմել է ԱՄՆ֊ին օգնության խնդրանքով

Վրաստանի կալանավորված  նախկին նախագահ Միխայիլ Սահակաշվիլին օգնություն է խնդրել ԱՄՆ-ից։

Ավելի վաղ ԱՄՆ Պետդեպարտամենտը կոչ էր արել Վրաստանի իշխանություններին թույլ տալ Սահակաշվիլիին ներկա գտնվել իր գործով բոլոր դատական ​​նիստերին և նախկին նախագահի հետ վարվել «արդար և արժանապատիվ»։

«Եթե Միացյալ Նահանգները չգա ինձ պաշտպանելու, դա սարսափելի ազդանշան կլինի բոլոր արևմտամետ առաջնորդների և ժողովուրդների համար»,- գրել է Սահակաշվիլին, հաղորդում է Bloomberg-ը։

Գործակալությունը նշում է, որ Սահակաշվիլին չորեքշաբթի օրը փաստաբանների միջոցով հանձնել է հրատապ հարցերի «ձեռագիր» պատասխանները։ Նա, ի թիվս այլ բաների, գրել է, որ կալանավայրում իրեն ծեծի են ենթարկել և ասֆալտի վրայով քարշ են տվել այլ բանտարկյալների «ծաղրի» ներքո։ Սահակաշվիլին նաև ուշադրություն է հրավիրել այն փաստի վրա, որ Վրաստանի իշխանությունները հրաժարվել են իրեն տեղափոխել քաղաքացիական հիվանդանոց, չեն փոխանցել հեռախոսը և հնարավորություն չեն տվել ներկա գտնվել դատավարությանը։

Վրաստանի արդարադատության նախարարությունը գործակալությանը հայտնել է, որ չի կարող մեկնաբանել նախկին նախագահի հայտարարությունները։