Սիրիայում Իսրայելի ավիահարվածի հետևանքով՝ խաղաղ բնակիչներ են զոհվել

Սիրիական Հոմս քաղաքի վրա իսրայելական հարձակման հետևանքով երկու խաղաղ բնակիչ է զոհվել, ևս 7-ը վիրավորվել է, ասվում է SAR բանակի հայտարարության մեջ, որը տարածել է սիրիական պետական ​​SANA գործակալությունը:

«Մեր հակաօդային պաշտպանությունը հետ է մղել հարձակումները՝ խոցելով հակառակորդի հրթիռների մեծ մասը։ Ագրեսիայի հետևանքով զոհվել է երկու խաղաղ բնակիչ, մեկը՝ ծանր վիրավորվել, վեց զինծառայող ևս վիրավորվել է, պատճառվել է նյութական վնաս»,֊ասվում է հաղորդագրության մեջ։

Սիրիայի և Իսրայելի միջև դիվանագիտական ​​հարաբերություններ չկան, երկու պետությունների ստեղծումից ի վեր՝ նրանք գտնվում են պատերազմական իրավիճակում։ Մասնավորապես, նրանք երկարաժամկետ տարածքային հակամարտություն ունեն Գոլանի բարձունքների կարգավիճակի շուրջ։

Իսրայելական զինվորականները բազմիցս հարվածներ են հասցրել Սիրիայում գտնվող թիրախներին՝ իրենց գործողությունները բացատրելով ժամանակակից զենքերը թշնամիների ձեռքն ընկնելը թույլ չտալու մտադրությամբ։ Խոսքն, առաջին հերթին, լիբանանյան «Հեզբոլլահ» շարժման մասին է, որը տարածաշրջանում կռվում է Բաշար Ասադի կողմից և վերահսկվում է Թեհրանի կողմից։
Դամասկոսը բազմիցս դիմել է ՄԱԿ-ի Անվտանգության խորհրդին՝ պահանջելով ճնշում գործադրել Թել Ավիվի վրա՝ դադարեցնելու Սիրիայի ինքնիշխանության համակարգված խախտումը, քանի որ դա սպառնում է ողջ տարածաշրջանի կայունությանը։