ԱՄՆ-ն կարող է սահմանափակել զորավարժությունները Եվրոպայում՝ Ռուսաստանի հետ կոնֆլիկտից խուսափելու համար․ WSJ

Ռուսաստանի և Ուկրաինայի միջև առկա «լարվածության» ֆոնին ԱՄՆ նախագահ Ջո Բայդենի վարչակազմը քննարկում է գործողությունների մի քանի տարբերակ, այդ թվում՝ Եվրոպայում զորավարժությունները կրճատելու հնարավորությունը՝ Մոսկվայի հետ առճակատումից խուսափելու համար, գրում է Wall Street Journal-ը։

Ըստ այդ տվյալների՝ որպես գործողության հնարավոր տարբերակներից մեկը՝ ԱՄՆ վարչակազմը դիտարկում է Ուկրաինայի պաշտպանունակության ուժեղացումը՝ ներառյալ ռազմական տեխնիկայի, մասնավորապես՝ հակաօդային համակարգերի մատակարարման ավելացումը։ Այս տարբերակը ենթադրում է նաև ավելի խիստ պատժամիջոցներ Ռուսաստանի Դաշնության դեմ։

Գործողությունների մեկ այլ հնարավոր ծրագիր, թերթի բնորոշմամբ, ենթադրում է «Մոսկվայի հետ առճակատման ռիսկի նվազեցում, այդ թվում՝ Եվրոպայում ԱՄՆ զորավարժությունների քանակի սահմանափակմամբ»։ Այս զորավարժությունները, ինչպես նշվում է հոդվածում, շարունակում են քննադատություն առաջացնել Ռուսաստանի Դաշնության կողմից։ Ծրագիրը ներառում է նաև Կիևին ԱՄՆ ռազմական օգնության դադարեցում։