Պոմպեոն նիհարել է 40 կիլոգրամով՝ նախագահի պաշտոնի համար պայքարելու հույսով. Times

Համացանցում են հայտնվել նկատելիորեն նիհարած Մայք Պոմպեոյի նկարները։ Դրանք հիմք են տվել ենթադրելու, որ ԱՄՆ նախկին պետքարտուղարը ծրագրում է 2024 թվականին մրցակցել նախագահի պաշտոնի համար, գրում է The Times-ը։

Պարբերականի խոսքով՝ ինքը՝ Պոմպեոն, դեռ չի բացահայտել՝ պատրաստվում է արդյոք մասնակցել Սպիտակ տանը պաշտոնավարելու մրցարշավին։ Սակայն որոշ ամերիկյան լրատվամիջոցներ նրան արդեն իսկ ընդգրկել են Հանրապետական ​​կուսակցության պոտենցիալ թեկնածուների տասնյակում:
 
«Ամերիկան ​​ավելի քիչ է տեսնում Պոմպեոյին ոչ միայն այն պատճառով, որ Թրամփի վարչակազմը լքել է Սպիտակ տունը։ Նա իսկապես նվազել է, ավելի ճիշտ՝ 90 ֆունտով (գրեթե 41 կիլոգրամով - խմբ.)»,- հեգնանքով նշում է New York Post-ը, որը հարցազրույց է վերցրել քաղաքական գործչից։
 
ԿՀՎ-ի նախկին տնօրենը խոստովանել է, որ որոշել է ավելի առողջ ապրելակերպ վարել անցյալ հունիսին կշռվելուց հետո։ Քաղաքական գործիչը պարզել է, որ իր կյանքում առաջին անգամ կշռում է գրեթե 300 ֆունտ (136 կիլոգրամ – խմբ.): Նա բացատրել է, որ իր քաշը աստիճանաբար ավելացել է 2010 թվականին Կոնգրեսում որպես Կանզաս նահանգի ներկայացուցիչ ընտրվելուց հետո:
 
Պոմպեոն ասել է, որ ինքը «սկսել է սպորտով զբաղվել ոչ թե ամեն օր, այլ գրեթե ամեն օր, և ճիշտ սնվել, որից հետո քաշն սկսել է նվազել»։ Նրա խոսքով՝ ինքը մարզասրահ չի հաճախել, այլ նախընտրել է գնել սեփական սարքավորումները` տնային մարզումների համար։
 
«Մենք (Պոմպեո ընտանիքը - խմբ) իտալացիներ ենք, և մեզ դուր է գալիս համեղ կերակուրներ` մակարոնեղենի, հացի, պանրի և աղանդերի հետ: Մենք նախկինի պես կշարունակենք դրանք վայելել ընկերների և ընտանիքի ընկերակցությամբ: Միայն թե այժմ ես կլինեմ այն ​​տղան, ով կասի. «Ահա, թերևս, ես վերցնեմ աղցանը», - ասել է Պետքարտուղարության նախկին ղեկավարը։

 
Պոմպեոն, ով չորս տարի աշխատել է Թրամփի վարչակազմում, առայժմ խուսափում է ուղիղ պատասխան տալ իր նախագահական հավակնությունների վերաբերյալ հարցին։ Սակայն անցյալ տարի Fox News-ին տված հարցազրույցում նա նշել էր, որ «միշտ պատրաստ է լավ մենամարտի»։ Ավելին, քաղաքական գործիչն այցելել է այն նահանգները, որտեղ անցկացվում են արտահերթ նախագահական ընտրություններ՝ միայն հաստատելով իր հնարավոր առաջադրման մասին լուրերը, ուշադրություն է հրավիրում The Times-ը։