ԱՄՆ-ում հայտնել են Ուկրաինայում ուրիշի դրոշի ներքո գործողություններ իրականացնելու Ռուսաստանի պլանների մասին. CNN

ԱՄՆ-ն ապացույցներ ունի, որ Ռուսաստանը օպերատիվ խումբ է պատրաստել Ուկրաինայի արևելքում ուրիշի դրոշի ներքո գործողություն իրականացնելու համար: Այս մասին հայտնում է CNN-ը՝ վկայակոչելով ԱՄՆ անանուն պաշտոնյային։

Հեռուստաալիքի զրուցակիցն ասել է, որ ռուս զինվորականները վերապատրաստվել են քաղաքային պայմաններում մարտեր վարելու և պայթուցիկ նյութեր օգտագործելու համար։ Նրա խոսքով՝ ԱՄՆ նախագահ Ջո Բայդենի վարչակազմը կարծում է, որ Ռուսաստանը կարող է նախապատրաստվել Ուկրաինա ներխուժման, որը կարող է հանգեցնել մարդու իրավունքների զանգվածային խախտումների և ռազմական հանցագործությունների, եթե դիվանագիտությունը չհասնի իր նպատակներին։

«Ռուսական զինուժը նախատեսում է սկսել այդ գործողությունները ռազմական ներխուժումից շաբաթներ առաջ, որը կարող է սկսվել հունվարի կեսերից փետրվարի կեսերին: Այս սխեման մենք տեսել ենք 2014 թվականին Ղրիմի հետ կապված»,- ասել է պաշտոնյան։

ԱՄՆ իշխանությունները նաև տեսնում են, թե ինչպես է Կրեմլն սկսել ակտիվորեն տեղեկություն տարածել քաղաքացիների շրջանում հնարավոր միջամտության մասին` խոսելով ներառյալ Ուկրաինայում մարդու իրավունքների իրավիճակի վատթարացման և ուկրաինական ղեկավարության ռազմատենչության աճի մասին, CNN-ին հայտնել է աղբյուրը։ «Դեկտեմբերին սոցցանցերի ռուսալեզու կոնտենտը, որն ընդգրկում է այս բոլոր հայտարարությունները, աճել է միջինը օրական մոտ 3500 հրապարակման, ինչը 200 տոկոսով ավել է, քան նոյեմբերի օրական միջին ցուցանիշը», - ասել է նա: