Կորոնավիրուսը դեռ մի քանի տարի մեզ հետ կլինի․ Pfizer֊ի հիմնադիրը՝ COVID-19֊ի մասին

Pfizer դեղագործական ընկերության գործադիր տնօրեն Ալբերտ Բուրլան կարծում է, որ կորոնավիրուսը չի անհետանա դեռ մի քանի տարի, բայց մարդկությանը հասանելի միջոցները շուտով թույլ կտան վերադառնալ նախկին կյանքին։

«Չեմ ուզում հոռետես թվալ, բայց կարծում եմ, որ մենք ստիպված կլինենք մի քանի տարի ապրել մի վիրուսով, որը շատ դժվար է արմատախիլ անել։ Այն տարածվել է ամբողջ աշխարհում, կարող է մի քանի անգամ վարակել նույն մարդուն և ունի այնքան մուտացիաներ, որ մենք նորից հայտնաբերել ենք հունական այբուբենը»,- ասել է նա իտալական la Repubblica թերթին:

Պատասխանելով այն հարցին, թե արդյո՞ք Omicron շտամի հայտնվելը նշանակում է համաճարակի ավարտ, ամերիկյան ընկերության ղեկավարն ասել է․ «Ոչ ոք դա չի կարող ասել»։

«Հարցը ոչ այնքան այն է, թե արդյո՞ք վիրուսը կվերանա, թե՞ ոչ, այլ այն, թե արդյո՞ք մենք կարող ենք վերադառնալ բնականոն կյանքին: Կարծում եմ, որ հաջողության կհասնենք, հավանաբար, գարնանը՝ մեր ձեռքի տակ եղած բոլոր միջոցներով՝ թեստեր, շատ արդյունավետ պատվաստանյութեր և առաջին դեղամիջոցները, որոնք կարելի է ընդունել տանը», - ասել է Բուրլան։
Խոսելով այս մասին՝ նա նշել է, որ Paxlovid մասնագիտացված դեղամիջոցը ֆրանսիական դեղատներում կհայտնվի հունվարի վերջին։