Բուրկինա֊Ֆասոյի նախագահը ձերբակալվել է

Զինվորականները ձերբակալել են Բուրկինա Ֆասոյի նախագահ Ռոկե Մարկ Քրիստիան Կաբորեին և նրան պահում են բանակային բազաներից մեկում։ Այս մասին երկուշաբթի օրը հայտնել է Reuters գործակալություն։

Իր հերթին, Radio France Internationale ռադիոկայանի թղթակիցը, ով գտնվում է Բուրկինիայի մայրաքաղաք Ուագադուգուում, հայտնել է, որ բազմաթիվ աղբյուրներ հաստատում են նախագահ Կաբորեի ձերբակալությունը։ Ռադիոկայանի տվյալներով՝ ապստամբները պահանջում են Կաբորեի հրաժարականը պետության ղեկավարի պաշտոնից։ 

AFP-ն հայտնել է, որ երկուշաբթի առավոտյան դիմակավորված զինվորներ են հայտնվել պետական ​​հեռուստատեսության շենքի դիմաց։ Ըստ տեղեկությունների՝ անցած գիշերվա ընթացքում իշխանությունները և ապստամբների ղեկավարությունը բանակցություններ են վարել, որոնք անարդյունք են ավարտվել։

Հայտնի է, որ հունվարի 23-ին Բուրկինա Ֆասոյի մի քանի ռազմաբազաներում տեղի է ունեցել ռազմական ապստամբություն։