Գերմանիայում կաթոլիկ եկեղեցու 125 ներկայացուցիչներ հայտնել են իրենց՝ ԼԳԲՏ համայնքին հարելու մասին

Գերմանիայում կաթոլիկ եկեղեցու 125 ներկայացուցիչներ հունվարի 24-ի վաղ առավոտյան հրապարակավ հայտարարել են իրենց ոչ ավանդական սեռական կողմնորոշման  մասին՝ պահանջելով փոխել եկեղեցական աշխատանքային օրենսդրությունը: Նրանք նաև խրախուսել են մյուս կաթոլիկներին միանալ #OutInChurch նախաձեռնությանը:

Ինչպես նշվում է հաղորդագրության մեջ, ԼԳԲՏՔ+-ին իրենց պատկանելությունը հայտնողների թվում կան քահանաներ, հովիվ-ռեֆերենտներ և կաթոլիկ համայնքների առաջնորդներ, կրոնական դպրոցների ուսուցիչներ և եկեղեցու վարչակազմի աշխատակիցներ։

Ակցիային մասնակցողների պահանջների համաձայն՝ կաթոլիկ եկեղեցին պետք է դադարեցնի սեռական կողմնորոշումն ու գենդերային ինքնությունը՝ որպես աշխատանքից ազատման պատճառ օգտագործելը, բացի այդ՝ եկեղեցական ուսուցումից պետք է բացառվեն սեռի և սեռականության վերաբերյալ զրպարտչական արտահայտությունները։

Ըստ քահանա Բերնդ Մյոնկեբյուշերի, ով 2021 թվականին նախաձեռնել է միասեռական զույգերի օրհնությունը, եկեղեցական միջավայրում ակցիան ոգեշնչված է անցյալ տարվա օրինակով, երբ 185 գերմանացի դերասանուհիներ և դերասաններ հայտնեցին, որ իրենք ԼԳԲՏՔ+ համայնքի ներկայացուցիչներ են: