Վրաստանը ԵՄ-ին կոչ է արել հրաժարվել «Հարավային Օսիա» եզրույթից

Վրաստանի խորհրդարանի արտաքին հարաբերությունների հանձնաժողովի նախագահ Նիկոլոզ Սամխարաձեն կոչ է արել Եվրամիությանը հրաժարվել «Հարավային Օսիա» եզրույթի օգտագործումից, քանի որ այն «ստալինյան» է, գրում է Взгляд թերթը։

Պահանջը ներկայացվել է Եվրախորհրդարանի Վրաստանի հարցով զեկուցող Սվեն Միկսերին։ Սամխարաձեի խոսքով՝ «ստալինյան ժառանգության դեմ Արևմուտքի պայքարի համատեքստում անթույլատրելի է Եվրամիության պաշտոնական փաստաթղթերում «Հարավային Օսիա» եզրույթի հիշատակումը»։

«Այս եզրույթը ստեղծվել է 1922 թվականին, մինչ այդ այն գոյություն չուներ, մանավանդ, որ Վրաստանի սահմանադրությունը չի ճանաչում Հարավային Օսիա անունով տարածք: Մենք կոչ ենք անում քննարկել այդ եզրույթը ԵՄ պաշտոնական փաստաթղթերից հանելու հարցը», - ասել է Սամխարաձեն։

Նա հավելել է, որ 2008 թվականի օգոստոսի իրադարձություններից հետո այս անվան օգտագործումը «տհաճ է Թբիլիսիի համար»։

Ինչպես հայտնի է, 2008 թվականի օգոստոսի 8-ի գիշերը Մոսկվան հայտարարեց խաղաղապահ գործողության մասին, որով Վրաստանին խաղաղություն էր պարտադրելու Հարավային Օսիայի դեմ ագրեսիայի դրսևորումից հետո։

Գործողությունը տևեց հինգ օր, ինչի արդյունքում՝ վրացական զորքերը դուրս մղվեցին Հարավային Օսիայի տարածքից։ Ռուսաստանը ճանաչեց Հարավային Օսիայի անկախությունը, ինչպես նաև Աբխազիայի ինքնիշխանությունը 2008 թվականի օգոստոսի 26-ին։ Դրանից հետո Վրաստանը խզեց դիվանագիտական ​​հարաբերությունները Ռուսաստանի Դաշնության հետ։