Որոշ արտասահմանյան հեռուստաալիքներ կդադարեցնեն հեռարձակումը Ռուսաստանում

Ամերիկյան CBS News եւ ABC News հեռուստաալիքները հայտարարել են Ռուսաստանում հեռարձակման դադարեցման մասին՝ ուրբաթ օրը ՌԴ ԶՈւ գործողությունների մասին ֆեյքերը քրեականացնող օրենքի ընդունման հետ կապված, հայտնում է «Ինտերֆաքս»-ը՝ վկայակոչելով ԶԼՄ-ները։

Կանադական CBC կորպորացիան եւս միացել է ամերիկյան հեռուստաալիքներին, ինչի մասին հայտնել է տարածված հայտարարության մեջ:

Ավելի վաղ հաղորդվել էր, որ ամերիկյան CNN հեռուստաալիքի ղեկավարությունը Ռուսաստանում հեռարձակումը դադարեցնելու որոշում է կայացրել:

«CNN-ը կդադարեցնի հեռարձակումը Ռուսաստանում մինչ մենք գնահատում ենք իրավիճակը եւ որոշում կկայացնենք հետագա քայլերի մասին», - ասել է հեռարձակողի ներկայացուցիչը։

ԶԼՄ-ները նշում են, որ CNN-ն այս որոշումը կայացրել է նաեւ Ռուսաստանում ՌԴ Զինված ուժերի մասին ֆեյքերը քրեականացնող օրենքի ընդունման կապակցությամբ։

Ռուսաստանում իր լրագրողների գործունեության ժամանակավոր դադարեցման մասին հայտնել է նաեւ BBC-ն:

Հեռուստաալիքի գործադիր տնօրեն Թիմ Դեյվին հայտարարել է, որ օրենսդրությունը «կարծես քրեականացնում է անկախ լրագրության գործընթացը»:

«Bloomberg News»-ը ժամանակավորապես կդադարեցնի իր լրագրողների աշխատանքը Ռուսաստանում»,- Պուտինի քայլին ի պատասխան հայտարարել է Նյու Յորքում գործող ընկերությունը: Օրենքի փոփոխությունները, ըստ երեւույթին, նախատեսված են յուրաքանչյուր անկախ լրագրողի հանցագործ դարձնելու համար, ասվում է Bloomberg-ի գլխավոր խմբագիր Ջոն Միքլթուեյթի հայտարարության մեջ: Նրա խոսքով՝ դա անհնարին է դարձնում «երկրում նորմալ լրագրությանը նման ցանկացած բան», հաղորդում է Deutsche Welle-ն։