Յանուկովիչի ինքնաթիռը Մոսկվայից թռել է Մինսկ. «Эхо Кавказа»

Բելառուսում ուկրաինական և ռուսական պատվիրակությունների այսօրվա բանակցություններից քիչ առաջ Մինսկում վայրէջք է կատարել ինքնաթիռ, որից նախկինում օգտվում էր Վիկտոր Յանուկովիչը։ Այն, որ մասնավոր Dassault Falcon 900C օդանավը՝ RA-09617 բորտային համարով, վայրէջք է կատարել Մինսկի օդանավակայանում, վկայում են FlightRadar ինքնաթիռների մոնիտորինգի կայքի տվյալները, գրում է «Эхо Кавказа»-ն։

Ըստ այդ տվյալների՝ ինքնաթիռը օդ է բարձրացել Մոսկվայի «Վնուկովո» օդանավակայանից Կիևի ժամանակով 13:30-ին և մեկ ժամ անց վայրէջք կատարել Մինսկի օդանավակայանում։

Յանուկովիչի նախագահության ժամանակ օդանավն ուներ UR-CRD բորտային համարը և պատկանում էր ուկրաինական «Ցենտրավիա» ՍՊԸ-ին, հիշեցնում է «Ազատություն» ռադիոկայանի ուկրաինական ծառայությունը։

Flightradar24-ի փոխանցմամբ՝ ռուսական ռազմական գործողություններից ի վեր այս ինքնաթիռը մի քանի անգամ Սոչիից թռել է Մոսկվա և հակառակ ուղղությամբ։