Այդպես բոլորը կպարտվեն․ Չինաստանի ԱԳՆ֊ն՝ ՌԴ֊ի դեմ պատժամիջոցների մասին

Ռուսական նավթի ու գազի արտահանման դեմ պատժամիջոցների սահմանումը կհանգեցնի տնտեսական խնդիրների, որոնք կազդեն բոլորի վրա։ Այս մասին չորեքշաբթի օրը ճեպազրույցում հայտարարել է Չինաստանի ԱԳՆ պաշտոնական ներկայացուցիչ Չժաո Լիջյանը։
«Չինաստանը կտրականապես դեմ է միակողմանի պատժամիջոցներին, որոնք հիմնված չեն միջազգային իրավունքի վրա: Պատժամիջոցները մեզ խաղաղություն և անվտանգություն չեն բերի: Դա միայն լուրջ խնդիրների կհանգեցնի այդ երկրների տնտեսության և կյանքի որակի համար», - ասել է նա:

«Նման սցենարի դեպքում բոլորը կպարտվեն: Պատժամիջոցները միայն կուժեղացնեն անմիաբանությունն ու առճակատումը»,- հավելել է դիվանագետը: «Չինաստանը և Ռուսաստանը շարունակում են կայուն համագործակցությունը էներգետիկ ոլորտում: Եվ մենք կշարունակենք բնականոն առևտրային փոխգործակցությունը` հիմնված հավասարության, փոխադարձ հարգանքի և շահի սկզբունքների վրա՝ ներառյալ նավթի և գազի ոլորտում։ Չինաստանի կառավարությունը վճռական քայլեր կձեռնարկի, եթե արևմտյան երկրները ճնշում գործադրեն չինական ընկերությունների վրա Ռուսաստանի դեմ սահմանված պատժամիջոցների պատճառով»,֊ասել է Լիջյանը։

«Պատժամիջոցները երբեք արդյունավետ միջոց չեն եղել խնդիրները լուծելու համար: Չինաստանը կտրականապես դեմ է ԱՄՆ-ի ցանկացած միակողմանի պատժամիջոցներին և դրանց կողմից արտատարածքային սկզբունքի կիրառմանը: Ուկրաինայի հարցը և Ռուսաստանի հետ հարաբերությունները քննարկելիս՝ ամերիկյան կողմը պետք է խստորեն և ճշգրիտ հաշվի առնի Չինաստանի դիրքորոշումը, մտահոգությունները և թույլ չտա չինական կողմի իրավունքների ու շահերի ոտնահարում։ Չինաստանը կձեռնարկի բոլոր անհրաժեշտ միջոցները՝ չինական ձեռնարկությունների և անհատների օրինական իրավունքներն ու շահերը վճռականորեն պաշտպանելու համար»,- եզրափակել է դիվանագետը։