Եթե ՆԱՏՕ֊ն միջամտի ռուս֊ուկրաինական հակամարտությանը, կարող է երրորդ համաշխարհային պատերազմ սկսվել․ Շառլ Միշել

ՆԱՏՕ-ի մուտքն Ուկրաինայի շուրջ հակամարտություն կարող է վերածվել երրորդ համաշխարհային պատերազմի։ Այս կարծիքն է հայտնել Եվրոպական խորհրդի նախագահ Շառլ Միշելը El Pais թերթին տված հարցազրույցում։

«Մենք անում ենք ամեն ինչ, որպեսզի չսրենք հակամարտությունը,- պնդել է նա:- Ռուսաստանը միջուկային տերություն է, և մենք լավ գիտենք, որ եթե այս հակամարտությունը վերածվի ՆԱՏՕ-ի և Ռուսաստանի միջև բախումների, ապա մենք կհասնենք երրորդ համաշխարհային պատերազմին»,֊ասել է Շառլ Միշելը։

«Ես մշտական ​​կապի մեջ եմ Ուկրաինայի նախագահ Վլադիմիր Զելենսկու հետ։ Ճիշտ է, նա ավելին էր ուզում: Բայց ԵՄ֊ի ընդլայնումը նուրբ հարց է, որի վերաբերյալ ոչ բոլոր եվրոպական երկրներն ունեն նույն կարծիքը: Մենք պետք է հաշվի առնենք նաև այն երկրներին, որոնց հետ անդամակցության գործընթացն արդեն սկսվել է։ Մենք պետք է աջակցենք մեր գործընկերներին, ովքեր նայում են դեպի ազատ աշխարհ։ Ասոցացման համաձայնագրերն ունեն հսկայական ներուժ, որը թերագնահատված է»,- հավելել է Եվրախորհրդի ղեկավարը։

Ինչպես հայտնի է, փետրվարի վերջին Զելենսկին ԵՄ-ից խնդրել էր Ուկրաինային անհապաղ ընդգրկել եվրոպական համայնքում։ Մարտի 1-ին Ուկրաինայի ղեկավարի գրասենյակի ղեկավար Անդրեյ Երմակը հայտնել էր, որ ԵՄ-ին արագացված ընթացակարգով Ուկրաինայի միանալու դիմումն ընդունվել, գրանցվել և քննարկվում է։