Սիրիան 40 հազար մարտիկ է պատրաստում Ռուսաստանի համար․ Ուկրաինայի ՊՆ հետախուզություն

Ուկրաինական ռազմական հետախուզության տվյալներով՝ Սիրիայի նախագահ Բաշար ալ-Ասադը խոստացել է Ռուսաստանին տրամադրել 40 հազար մարտիկ՝ Ուկրաինայում պատերազմի համար։ Մոտ ապագայում Ռուսաստանի Դաշնությունը նախատեսում է զենք, ռազմական տեխնիկա և այլ ռեսուրսներ Սիրիայից տեղափոխել Բելառուս՝ ռուսական ուժերին ապահովելու համար։ Այս մասին այսօր՝ մարտի 17-ին, հայտնում է Ուկրաինայի պաշտպանության նախարարության գլխավոր հետախուզական վարչությունը, գրում է Podrobnosti.ua֊ն։

«Խմեյմիմ ռուսական ռազմակայանի հրամանատարությանը հանձնարարվել է օրական մինչև 300 զինյալ ուղարկել Ուկրաինա։ Մարտի 15-ին Խմեյմիմ ռազմաբազայից Ռուսաստան է ուղարկվել 150 վարձկան՝ Ուկրաինայի դեմ ռազմական գործողություններին մասնակցելու համար»,- ասվում է զեկույցում։

<Հավաքագրման ժամանակ վարձկաններին խոստանում են, որ նրանք կկատարեն միայն ոստիկանական գործառույթներ՝ գրավյալ տարածքներում կարգուկանոն հաստատելու համար։ Սակայն վերջերս, ըստ հետախուզության տվյալների, վարձկանների շրջանում սկսել են տարածվել ուկրաինական բանակի դեմ ռազմական գործողություններին անմիջական մասնակցության մասին խոսակցություններ։ Սա զգալիորեն նվազեցրել է սիրիացիների «ոգին»»,֊գրում է պարբերականը։

Բացի այդ, վերջերս Ռուսաստանից Խմեյմիմ ռազմաբազա է ժամանել ավելի քան 30 զինյալ, որոնք վիրավորվել են ուկրաինացի զինվորականների հետ մարտերում։ Սա բացասաբար է ազդել այլ վարձկանների բարոյահոգեբանական վիճակի վրա և հանգեցրել է նրանցից ոմանց հրաժարվելուն ռազմական գործողություններին մասնակցելուց, ասվում է հետախուզական զեկույցում։

«Սիրիացի զինյալների շրջանում գրանցվել են անգամ ինքնախեղման դեպքեր: Վարձկանների մի մասը Ռուսաստան և Բելառուս ուղարկելը դիտարկում է՝ որպես հետագա դասալքության և ԵՄ երկրներ անօրինական միգրացիայի հնարավորություն»,- հայտնում է հետախուզական ծառայությունը, գրում է պարբերականը։