Այժմ անհնար է հրաժարվել ռուսական նավթից և գազից. ՌԴ փոխվարչապետ

Այժմ անհնար է հրաժարվել ռուսական նավթից և գազից, կարծում է ՌԴ փոխվարչապետ Ալեքսանդր Նովակը, հաղորդում է Ինտերֆաքսը:

 

«Մենք նույնպես հետևում ենք իրավիճակին, և կան բազմաթիվ տարբեր հայտարարություններ քաղաքական գործիչների կողմից, որ մենք կհրաժարվենք: Բայց, եթե ուշադրություն դարձրիք, մի քանի շաբաթ առաջ եվրոպացի էներգետիկայի նախարարները հանդիպեցին ռուսական գազից հրաժարվելու հարցով, հայտարարեցին, որ հիմա դա անհնար է։ 10 կետից բաղկացած որոշում ընդունեցին, թե ինչ են անելու մեր գազից դիվերսիֆիկացնելու համար, և վերջնաժամկետ ունեն մինչև 2030 թվականը։ Այնպես որ, այս պահին դա հնարավոր չէ։ Պետք է ավելի հեռուն նայել: Կարելիէ  ինչ ասես հայտարարել: Հայտարարեցին, որ պետք է ածուխից ազատվել, բայց արդյունքում անցած 2021 թվականը ցույց տվեց, որ գազի բարձր գների դեպքում ածխի արտադրությունն ավելի պահանջված դարձավ»,- ասել է նա Պետդումայում խմբակցությունների հետ հանդիպման ժամանակ։

 

«Նույնը նավթի դեպքում է. այժմ անհնար է փոխարինել ռուսական նավթին»,- ընդգծել է Նովակը։ Նա հիշեցրել է, որ Ռուսաստանը օրական 8 մլն բարել է արտահանում։

 

«Չնայած հայտարարություններ կհնչեն: Նույնիսկ եթե նրանց թիկունքում ոչինչ չկա, դրանք կհնչեն, կարևոր է, որ քաղաքական գործիչները ցույց տան, որ դեմ են Ռուսաստանին»,- պարզաբանել է փոխվարչապետը։

 

«Մենք կշարունակենք ապահովել էներգառեսուրսների մատակարարումը: Ծայրահեղ դեպքում, մենք, ամեն դեպքում, կշարժվենք դեպի Ասիա-Խաղաղօվկիանոսյան տարածաշրջան, կաշխատենք նրանց հետ բեռնման և մատակարարումների ուղղությամբ»,- եզրափակել է նա։