Լեհաստանի նախագահը ՆԱՏՕ-ին կառաջարկի խաղաղապահներ ուղարկել Ուկրաինա. ԶԼՄ-ներ

Լեհաստանի նախագահ Անջեյ Դուդան ՆԱՏՕ-ին կառաջարկի խաղաղապահներ ուղարկել Ուկրաինա։ Այս մասին հայտնում է լեհական kronika24.pl հրատարակությունը։

Դուդան պատրաստվում է այս առաջարկը հնչեցնել մարտի 24-ին Բրյուսելում կայանալիք Դաշինքի գագաթնաժողովում։ «Նախագահ Անջեյ Դուդան մեկնում է Բրյուսելում կայանալիք ՆԱՏՕ-ի գագաթնաժողովին, որտեղ կառավարության հետ միասին Ուկրաինայում խաղաղապահ առաքելություն իրականացնելու առաջարկ կներկայացնի»,- նշել են լրագրողները։

Լեհաստանի պաշտպանության նախարարությունն աշխատում է համապատասխան փաստաթղթի վրա։

Wprost-ի լեհական հրատարակությունը գրում է, որ Ուկրաինայում ՆԱՏՕ-ի խաղաղապահ առաքելությունը կարող է ներառել մինչև 10 հազար զինվոր Հյուսիսատլանտյան դաշինքի անդամ երկրներից։ «Դուդան չի ցանկանում կենտրոնանալ պաշտպանության նախարարության փաստաթղթի վրա, քանի դեռ ԱՄՆ-ն կանաչ լույս չի տվել»,- շեշտել են լրագրողները։

Մինչ ՆԱՏՕ-ի գագաթնաժողովը Ուկրաինա խաղաղապահներ ուղարկելու առաջարկը պետք է հաստատի ԱՄՆ նախագահ Ջո Բայդենը։

Լեհական Rzeczpospolita թերթը նշել է, որ Դանիայի և Լիտվայի կառավարությունները պետք է պատրաստ լինեն խաղաղապահ առաքելության շրջանակներում զինվորներ ուղարկել Ուկրաինա։

Ըստ Rzeczpospolita-ի՝ առաքելության նպատակներն են լինելու՝ ապահովել մարդասիրական բեռների և մարդասիրական միջանցքների անվտանգությունը, մարդասիրական օգնությամբ ավտոշարասյունների պաշտպանությունը, օգնություն խաղաղ բնակչության տարհանմանն այն տարածքներից, որտեղ ռազմական գործողություններ են տեղի ունենում, Ուկրաինայի խոշոր քաղաքների և միջանցքների վրա ոչ թռիչքային գոտիների ստեղծում՝ խաղաղ բնակիչներին օդային հարձակումներից պաշտպանելու համար։

Ավելի վաղ Դանիայի պաշտպանության նախարար Մորտեն Բեդսկովը հայտարարել էր, որ Դանիան պատրաստ է խաղաղապահներ ուղարկել Ուկրաինա, եթե համապատասխան խաղաղապահ առաքելություն սկսվի, հաղորդում է APnews-ը։ Նա ընդգծել է, որ իրենց բազմամյա փորձի շնորհիվ դանիացի խաղաղապահները կօգնեն դադարեցնել պատերազմն Ուկրաինայում։

«Եթե խաղաղապահ առաքելությունն սկսվի, Դանիան պատրաստ է միանալ դրան»,- ասել է Բեդսկովը։