Կտեսնենք՝ ով է գործընկերը և ով է վաճառվել. Զելենսկին ակնկալիքներ ունի ՆԱՏՕ-ի, ԵՄ-ի և G7-ի գագաթնաժողովներից

Ուկրաինայի նախագահ Վոլոդիմիր Զելենսկին հայտարարել է, որ ռուսներն արդեն սկսել են լոբբինգ իրականացնել՝ իրենց շահերը պաշտպանելու Ուկրաինայի արևմտյան որոշ գործընկերների հետ բանակցություններում, գրում է Tsn֊ը։

Զելենսկին երախտագիտություն է հայտնել միջազգային գործընկերներին օգնության համար և հույս հայտնել, որ Բրյուսելում մեկնարկող ՆԱՏՕ-ի, ԵՄ-ի և G7-ի գագաթնաժողովները ազատության համար պայքարում կցուցաբերեն հետագա աջակցություն ուկրաինական պետությանը։

Ուկրաինայի նախագահը հիշեցրել է, որ մարտի 24-ին Բրյուսելում կանցկացվեն միանգամից երեք գագաթնաժողովներ, որոնք կարևոր են ողջ աշխարհի անվտանգության համար՝ ՆԱՏՕ-ի, Եվրամիության և G7-ի գագաթնաժողովները։

«Վստահ եմ, որ մարդիկ ցույց կտան, թե ինչպես են մեզ սատարում: Բայց քաղաքական գործիչները պետք է աջակցեն ազատությանը: Նրանք բոլորը պետք է աջակցեն կյանքի համար պայքարին: Մենք սպասում ենք լուրջ քայլերի ՆԱՏՕ-ից, ԵՄ-ից և G7-ից»,- ընդգծել է Զելենսկին: