Ռուսաստանին հիբրիդային, տոտալ պատերազմ են հայտարարել․ Լավրով

Ռուսաստանի դեմ տոտալ պատերազմ է հայտարարված, Արևմուտքը չի թաքցնում, որ իր քաղաքականության նպատակը ռուսական տնտեսությունը խեղդելն ու ոչնչացնելն է։ Այդ մասին ուրբաթ օրը հայտարարել է ՌԴ ԱԳ նախարար Սերգեյ Լավրովը Ալեքսանդր Գորչակովի Հանրային դիվանագիտության աջակցության հիմնադրամի կոլեգիայի նիստում, գրում է ՏԱՍՍ֊ը։

«Այսօր մեզ հայտարարվել է իսկական հիբրիդային, տոտալ պատերազմ։ Այս տերմինը, որն օգտագործում էր հիտլերյան Գերմանիան, այժմ օգտագործում են շատ եվրոպացի քաղաքական գործիչներ, երբ խոսում են այն մասին, թե ինչ են ուզում անել Ռուսաստանի Դաշնության հետ: Նպատակները չեն թաքցվում, դրանք հրապարակայնորեն հայտարարվում են՝ քանդել, ջարդել, ոչնչացնել, խեղդել ռուսական տնտեսությունը և ամբողջ Ռուսաստանը»,- ասել է դիվանագիտական ​​գերատեսչության ղեկավարը։

Նա նշել է, որ այս «պատժամիջոցային անօրինականության» մեջ ակնհայտ է դառնում, որ բոլոր արժեքները, որոնք արևմտյան գործընկերները քարոզել են Ռուսաստանին՝ խոսքի ազատություն, շուկայական տնտեսություն, մասնավոր սեփականության անձեռնմխելիություն, անմեղության կանխավարկած, արժեք չունեն։