Ռուսաստանը պատրաստ է հրաժարվել Ուկրաինայի նկատմամբ իր պահանջների մեծ մասից. Financial Times

Ռուսաստանը պատրաստ է հրաժարվել իր պահանջների մեծ մասից, որոնցով սկսել է պատերազմն Ուկրաինայում, գրում է Financial Times-ը՝ վկայակոչելով չորս անձանց, որոնք տեղեկացված են ռուս-ուկրաինական հրադադարի շուրջ բանակցությունների ընթացքի մասին։ Այս մասին գրում է BBC-ի ռուսական ծառայությունը։

Ըստ հոդվածի՝ Ռուսաստանը շարունակում է պնդել, որ Ուկրաինան հրաժարվի ՆԱՏՕ-ին միանալու ծրագրերից, երրորդ երկրների ռազմաբազաներ չտեղակայվեն Ուկրաինայի տարածքում և երաշխիքներ, որ Ուկրաինան չի փորձի միջուկային զենք ստեղծել։

Սակայն FT-ի աղբյուրների համաձայն, Մոսկվան պատրաստ է համաձայնել Ուկրաինայի անդամակցությանը ԵՄ-ին և ռազմական հզոր տերությունների մեծ մասի, այդ թվում՝ ԱՄՆ-ի և Մեծ Բրիտանիայի կողմից Ուկրաինայի անվտանգության բազմակողմ երաշխիքներին։  Ոչ «ապառազմականացումը», ոչ «դենացիֆիկացիան», ոչ էլ ռուսաց լեզվի կարգավիճակի երաշխիքները ներառված չեն համաձայնագրի նախագծում, պնդում է թերթը։

Ուկրաինական պատվիրակության անդամ Դավիթ Արախամիան թերթին ասել է, որ Ուկրաինայի անվտանգության երաշխիքները, որոնք, համաձայնագրի հեղինակների կարծիքով, պետք է վավերացնեն Ռուսաստանը, Չինաստանը, ԱՄՆ-ը, Մեծ Բրիտանիան, Կանադան, Ֆրանսիան, Գերմանիան, Իտալիան, Լեհաստանը, Թուրքիան և Իսրայելը, «մոտ են» Հյուսիսատլանտյան պայմանագրի 5-րդ հոդվածին, ըստ որի՝ դաշինքի բոլոր անդամները պարտավորվում են պաշտպանել երրորդ երկրի ագրեսիայի զոհ դարձած դաշնակիցներից որևէ մեկին։

Միևնույն ժամանակ, ուկրաինացի և արևմտյան դիվանագետները հայտնում են, որ զիջումների գնալու Ռուսաստանի պատրաստակամության հետևում ժամանակ շահելու և նոր հարձակման համար ուժերը վերախմբավորելու և համալրելու ցանկությունն է, գրում է FT-ն: