Ջո Բայդենը և եվրոպացի դաշնակիցները մտադիր են շարունակել պատժամիջոցները Ռուսաստանի դեմ․ The Guardian

Ջո Բայդենը և եվրոպացի դաշնակիցները մտադիր են շարունակել պատժամիջոցները Ռուսաստանի դեմ՝ որպես պատիժ Ուկրաինա ներխուժելու համար, հայտարարել է Սպիտակ տունը այն բանից հետո, երբ ԱՄՆ նախագահը զրուցել է տարբեր պետությունների ղեկավարների հետ, գրում է The Guardian-ը:

Երեքշաբթի օրը Բայդենի՝ Մեծ Բրիտանիայի վարչապետ Բորիս Ջոնսոնի, Գերմանիայի կանցլեր Օլաֆ Շոլցի, Ֆրանսիայի նախագահ Էմանուել Մակրոնի և Իտալիայի վարչապետ Մարիո Դրագիի հետ հեռախոսազրույցներից հետո կարելի է ենթադրել, որ առաջնորդները համաձայնության մեջ են ռազմավարության հարցում:

«Առաջնորդները հաստատեցին իրենց վճռականությունը՝ շարունակելու խստացնել պատժամիջոցները Ռուսաստանի վրա Ուկրաինայում նրա դաժան հարձակումների համար, ինչպես նաև շարունակել Ուկրաինային անվտանգության աջակցություն տրամադրել՝ պաշտպանվելու այս չարդարացված և չհրահրված հարձակումից», - ասվում է Սպիտակ տան կարճ հայտարարության մեջ:

Բացի ՆԱՏՕ-ի դաշնակիցների միասնական մոտեցումից Ռուսաստանին դիմակայելու հարցում՝ հայտարարությունը խորհրդանշական էր շաբաթվա վերջին Բայդենի հայտարարություններից հետո, որ Ռուսաստանի նախագահ Վլադիմիր Պուտինը «մսագործ է, որը չի կարող մնալ իշխանության ղեկին», գրում է պարբերականը:

Ինչպես հայտնի է, Մակրոնը, մասնավորապես, բարկացած էր Բայդենի բառերի ընտրությունից և նախազգուշացրել էր «բառերը ուշադրությամբ ընտրել»՝ առանց ուղղակիորեն անդրադառնալու ԱՄՆ նախագահի մեկնաբանություններին: