Գերմանիայում խուզարկություններ են իրականացվել «Գազպրոմի» գրասենյակներում. Bloomberg

Եվրամիության հակամենաշնորհային կարգավորիչի ներկայացուցիչները խուզարկություններով եկել են ռուսական «Գազպրոմի» գրասենյակներ, հայտնում են Reuters-ը և Bloomberg-ը՝ հղում անելով աղբյուրներին։

Ինչպես հայտնում է Bloomberg-ը, խուզարկությունները տեղի են ունեցել գերմանական ստորաբաժանումներում, այդ թվում՝ «Gazprom Germania»-ում և «Wingas»-ում, որոնք գազ են մատակարարում գերմանական շուկայի մոտ 20%-ին։ Reuters-ը չի նշում խուզարկությունների վայրը, հաղորդում է РБК-ն։

Գործակալությունները գրում են, որ խուզարկությունները կապված են գազի մատակարարումների հետաքննության հետ։ Հակամենաշնորհային կարգավորիչը ստուգում է «Գազպրոմի» դերը Եվրոպայում գազի գնի աճի գործում:

Bloomberg-ը նշում է, որ հակամենաշնորհային հետաքննությունը ԵՄ-ում սկսվել է Ուկրաինա Ռուսաստանի ներխուժումից առաջ։ Ավելի վաղ՝ մարտին, էներգետիկայի հարցերով եվրահանձնակատար Կադրի Սիմսոնը Եվրախորհրդարանին ասել էր, որ փաստահավաք գործընթաց է ընթանում՝ «Գազպրոմի» հնարավոր հակամրցակցային վարքագծի հետաքննության շրջանակներում: ԵՄ օրենսդիրների և քաղաքական գործիչների կողմից հետաքննություն է պահանջվել՝ պարզելու, թե արդյոք ռուսական ընկերությունը չարաշահում է իր դիրքը՝ սահմանափակելով գազի մատակարարումը Եվրոպա, որպեսզի ճնշում գործադրի և հասնի «Հյուսիսային հոսք 2» գազատարի հաստատմանը։

РБК-ն հիշեցնում է, որ դեռ սեպտեմբերին Եվրախորհրդարանի մի խումբ պատգամավորներ հայտարարել էին, որ «Գազպրոմը» կարող է մեղավոր լինել գազի գնի ռեկորդային բարձրացման մեջ։ Նրանք Եվրահանձնաժողովին կոչ էին արել հետաքննել «Գազպրոմի կողմից շուկայի հնարավոր կանխամտածված մանիպուլյացիաները և ԵՄ մրցակցության կանոնների հնարավոր խախտումը»: