«Ուկրաինան անպարտելի է, քանի դեռ աշխարհը աջակցում է նրան». Զելենսկի

Աշխարհի պետություններին ուղղված տեսաուղերձներից մեկում Ուկրաինայի նախագահ Վլադիմիր Զելենսկին դիմել է Նիդեռլանդների խորհրդարան՝ խնդրելով աջակցել զենքով և օգնել երկրի վերականգնմանը։ Ինչպես նախկինում, Ուկրաինայի նախագահը կոչ է արել դադարեցնել բոլոր գործարար կապերն ու առևտուրը Ռուսաստանի հետ և էլ ավելի խիստ պատժամիջոցներ կիրառել:

«Ուկրաինան անպարտելի է, քանի դեռ աշխարհը աջակցում է նրան», -ասել է նախագահը իր ուղերձում։

Ավելի վաղ Ուկրաինայի առաջնորդը դիմել էր Ավստրալիայի խորհրդարանականներին և սենատորներին՝ ասելով, որ Ուկրաինան անպարտելի է Ռուսաստանի դեմ պատերազմում, քանի դեռ կարող է հույս դնել համաշխարհային հանրության աջակցության վրա։ Ուկրաինայի նախագահը խնդրել է ավստրալացիներին իր երկիր ուղարկել Bushmaster զրահափոխադրիչներ՝ ընդգծելով, որ այնտեղ նրանք «կարող են շատ ավելին անել մեր ընդհանուր ազատության և անվտանգության համար, քան երբ կայանված են ձեր տեղում»։

Պատահականորեն, նույն օրը Ավստրալիան հայտարարեց, որ լրացուցիչ 35% մաքսատուրք է սահմանում Ռուսաստանից և Բելառուսից երկիր մուտք գործող ապրանքների համար։ Այս մասին հայտնում է BBC-ն։