Մեծ տերությունների միջև բախման հավանականությունը մեծանում է. ԱՄՆ ԶՈՒ գեներալ

ԱՄՆ Զինված ուժերի շտաբի պետերի նախագահը զգուշացրել է, որ ժամանակակից աշխարհում մեծ տերությունների միջև զգալի միջազգային կոնֆլիկտի հավանականությունը մեծանում է, այլ ոչ թե նվազում, գրում է VOA-ն։

Ռուսաստանի զինված ներխուժումն Ուկրաինա «ամենալուրջ սպառնալիքն է Եվրոպայի և, հնարավոր է, աշխարհի խաղաղությանն ու անվտանգությանը  և ԱՄՆ բանակին իմ ամբողջ 42 տարվա կարիերայի ընթացքում», - ասել է գեներալ Մարկ Միլին Ներկայացուցիչների պալատի ԶՈՒ հանձնաժողովին:

«Միացյալ Նահանգները գտնվում է կրիտիկական և պատմական, աշխարհառազմավարական շրջադարձային կետում: Մենք հայտնվել ենք մի աշխարհում, որն ավելի անկայուն է դառնում, և մեծ տերությունների միջև զգալի միջազգային կոնֆլիկտի ներուժը մեծանում է, այլ ոչ թե նվազում», - ասել է Միլին: «Ռուսաստանը պահպանում է մեծ և բազմազան միջուկային կարողություն՝ սպառնալու ԱՄՆ-ին և նրա դաշնակիցներին: Մենք շատ սադրիչ հռետորաբանություն ենք լսել՝ կապված ռուսական միջուկային ուժերի պատրաստվածության մակարդակի հետ»,- ասել է կոմիտեի նախագահը։

Բացի այդ, ըստ Միլիի, ռուսական ներխուժումն Ուկրաինա ստեղծեց «վտանգավոր պատմական շրջադարձ»:

Միլլին զգուշացրել է, որ սխալ կլինի ակնկալել, որ Ուկրաինայում հակամարտությունը շուտափույթ ավարտ կունենա։

«Ես կարծում եմ, որ սա ձգձգվող հակամարտություն է, որը չափվելու է տարիներով։ Չգիտեմ՝ կարելի է խոսել մեկ տասնամյակի մասին, բայց մի քանի տարվա մասին՝ հաստատ»,- ասել է նա։ «Կարծում եմ, որ ԱՄՆ-ը, ՆԱՏՕ-ն, Ուկրաինան և բոլոր դաշնակիցներն ու գործընկերները, որոնք աջակցում են դրան, երկար ժամանակ ներքաշված կլինեն դրանում»:

Այնուամենայնիվ, ընդհանուր առմամբ, ըստ Միլիի, երկարաժամկետ հեռանկարում Չինաստանը մնում է ԱՄՆ-ի գլխավոր «աշխարհառազմավարական մարտահրավերը»։

«ՉԺՀ-ի հետ պատերազմն անխուսափելի չէ»,- եզրափակել է Միլլին։