Ռուսաստանը սպառնացել է ՄԱԿ-ի անդամներին իրեն հեռացնելու քվեարկությունից առաջ. CNN

Մինչև Ռուսաստանին Մարդու իրավունքների խորհրդի (ՄԻԽ) անդամի մանդատից ժամանակավորապես հեռացնելու վերաբերյալ ՄԱԿ-ի քվեարկությունը՝ ռուսական պատվիրակությունը նոտա է հղել կազմակերպության անդամներին՝ սպառնալով «հետևանքներով», եթե նրանք նման որոշում կայացնեն։
Այս մասին հինգշաբթի հայտնել է ամերիկյան CNN հեռուստաալիքը՝ վկայակոչելով ՄԱԿ-ի «բազմաթիվ աղբյուրների»։

Ռուսական նոտայում, որը լրագրողների տրամադրության տակ է հայտնվել, ասված է հետևյալը. «Հարկ է նշել, որ ոչ միայն նման նախաձեռնությանն աջակցելը, այլև քվեարկության ժամանակ չեզոք դիրքորոշումը (ձեռնպահ կամ բացակայություն) կդիտարկվի որպես ոչ բարեկամական ժեստ»:

Նոտան նախօրեին ուղարկվել է ՄԱԿ-ի անդամ երկրներին, և դրանում խոսվում է նաև «հետևանքների» մասին` այն երկրների համար, որոնք դեմ չեն քվեարկի Ռուսաստանին Մարդու իրավունքների խորհրդից հեռացնելուն։

Նշենք, որ ապրիլի 7-ին ՄԱԿ-ի Գլխավոր ասամբլեան բանաձեւ է ընդունել, որով կասեցվում է Ռուսաստանի անդամակցությունը Մարդու իրավունքների խորհրդին։ Հեռարձակումն իրականացվել է կազմակերպության կայքում։

Նախաձեռնությանը սատարել է 93 երկիր, դեմ՝ 24, այդ թվում՝ Չինաստանը, Բելառուսը, Ղազախստանը, Ղրղզստանը, Տաջիկստանը, Ուզբեկստանը, Սիրիան, Վիետնամը և Կենտրոնական Աֆրիկյան Հանրապետությունը։ Եվս 58-ը ձեռնպահ են մնացել։

«Կողմ» քվեարկողների թվում էին Սերբիան և Հունգարիան, իսկ ահա Հայաստանը, Ադրբեջանը, Թուրքմենստանը չեն քվեարկել: