ՆԱՏՕ-ի երկրները ռազմական տեխնիկա են մատակարարել Ռուսաստանին՝ շրջանցելով ԵՄ պատժամիջոցները. The Telegraph

Ֆրանսիան, Գերմանիան եւ առնվազն 10 եվրոպական այլ երկրներ Մոսկվային վաճառել են 230 միլիոն ֆունտ սթեռլինգ արժողությամբ ռազմական տեխնիկա եւ պաշտպանական սարքավորումներ, որոնք օգտագործվել են Կրեմլի կողմից Ուկրաինայի պատերազմի ժամանակ, ցույց է տվել ԵՄ-ի վերլուծությունը: Սպառազինության համակարգերի վաճառքն ակնհայտորեն «ապօրինի» է եղել ԵՄ էմբարգոյի ներքո, որը «արգելում է զենքի վաճառքը Ռուսաստանին ռուսական կողմից 2014թ․ Ղրիմի բռնակցումից հետո»։ Հիմնականում Ֆրանսիան, Գերմանիան եւ Իտալիան են օգտվել սպառազինությունների էմբարգոյի սողանցքից եւ հրթիռներ, արկեր, թնդանոթներ եւ ռումբեր արտահանել Մոսկվա, գրում է բրիտանական The Telegraph թերթը։ 

«Եվրամիության երկրները զենք են մատակարարել Մոսկվային՝ խախտելով իրենց իսկ էմբարգոն, որը սահմանվել է Ղրիմի բռնակցումից հետո»,- նշում է թերթը։

Հրատարակության մեջ մեջբերված լայնածավալ զեկույցը ցույց է տվել, որ ԵՄ երկրները շրջանցում են պատժամիջոցները, որոնք արգելում են «Ռուսաստան զենքի եւ հարակից նյութերի, այդ թվում՝ զենքի եւ զինամթերքի, ռազմական մեքենաների եւ սարքավորումների, ռազմական տեխնիկայի եւ դրանց պահեստամասերի ուղղակի կամ անուղղակի վաճառքը, մատակարարումը, փոխանցումը կամ արտահանումը»:

Էմբարգոն Եվրամիության կողմից սահմանվել է ութ տարի առաջ, սակայն ԵՄ երկրները, խախտելով 2014 թ․ օգոստոսի 1-ից առաջ կնքված պայմանագրերը, հարյուր միլիոնավոր դոլարների զենք են մատակարարել Ռուսաստանին, ասվում է զեկույցում։ Ֆրանսիան 76 արտահանման լիցենզիաներով Ռուսաստանին վաճառել է 152 միլիոն եվրո արժողությամբ պաշտպանական տեխնիկա՝ եվրոպական վաճառքի ընդհանուր ծավալը հասցնելով 1 միլիարդ եվրոյի։

Ըստ հրապարակման՝ հղում կատարելով զեկույցին, Գերմանիան Ռուսաստանին է մատակարարել տանկեր եւ հաուբիցներ, որոնք օգտագործվել են ռուսական զորքերի կողմից Ուկրաինայում հատուկ ռազմական գործողության ժամանակ։