Լավ կլինի՝ բերանը փակի․ Բրազիլիայի նախագահը՝ Լեոնարդո Դի Կապրիոյի մասին

Բրազիլիայի նախագահ Ժաիր Բոլսոնարոն կարծում է, որ Լեոնարդո Դի Կապրիոն պետք է դադարեցնի Ամազոնի հասարակածային անտառների մասին հայտարարություններ անելը։ Ամերիկացի դերասանը բազմիցս քննադատել է Հարավային Ամերիկայի Հանրապետության կառավարությանը և տարածաշրջանում նրա նախաձեռնությունները։
«Դի Կապրիոն պետք է իմանար, որ ԱՀԿ-ի (Առևտրի համաշխարհային կազմակերպության) տնօրենն ինքն է ասել, որ առանց բրազիլական ագրոբիզնեսի՝ աշխարհում սով կլիներ: Ուստի լավ կլինի, որ Դի Կապրիոն անհեթեթությունների փոխարեն՝ բերանը փակի»,- ասել է Բրազիլիայի նախագահը: Նա հիշեցրել է դերասանի հրապարակումները, ով սոցիալական ցանցերում ուշադրություն է հրավիրել Ամազոնի անտառներում բռնկված հրդեհների խնդրի վրա։ Այս հրապարակումները, ըստ Բոլսոնարոյի, ուղեկցվել են քսան տարի առաջվա լուսանկարներով։ 

Դի Կապրիոն նախօրեին սոցցանցերում կոչ էր արել բրազիլացի երիտասարդներին կազմել ընտրություններին մասնակցելու իրավունք տվող փաստաթղթեր։ Դերասանը նշել է, որ «մոլորակի առողջությունը» կախված է հոկտեմբերին հանրապետությունում կայանալիք համապետական ​​ընտրությունների արդյունքներից։ Ի պատասխան՝ Բոլսոնարոն համաձայնել է ընտրողների բարձր մասնակցության կարևորության հետ՝ ընդգծելով, որ այդ կերպ «Բրազիլիայի ժողովուրդը կորոշի՝ արդյո՞ք ցանկանում է պահպանել ինքնիշխանությունը Ամազոնի վրա, թե՞ հանդես են գալիս  ստահակների անունից, որոնք գործում են՝ արտաքին շահերից ելնելով»: