Սենատոր Սերգեյ Ցեկովն առաջարկել է օրենսդրական արգելք սահմանել

Ղրիմի սենատոր Սերգեյ Ցեկովը ՌԻԱ Նովոստիին ասել է, որ մտածում է օրինագիծ մշակելու հնարավորության մասին, որը կարգելի ԶԼՄ-ներում և ինտերնետային ռեսուրսներում Ուկրաինայում ռազմական գործողության մեկնարկից հետո Ռուսաստանից հեռացած արտիստների անունների հիշատակումը։

«Ես մտածում եմ նման օրենք մշակելու հնարավորության մասին, դա անհրաժեշտ է: Ժամանակն է որոշում կայացնելու՝ դրանք հակառուսական մարդիկ են, նրանց անունները պետք է ընդմիշտ մոռացվեն»,- ասել է նա։

Ցեկովն ընդգծել է, որ ցանկացած հիշատակում, նույնիսկ բացասական, ձեռնտու է արտիստներին, քանի որ դրանք դեռևս նպաստում են նրանց հայտնիությանը։ «Ինչպես ասում են՝ արտիստի համար, բացի մահախոսականից, իր մասին ցանկացած տեղեկություն, թեկուզ վատը, լավ է, դա իրենց համար գովազդ է: Ուրեմն ինչո՞ւ ենք մենք անընդհատ գրում նրանց մասին, որ վատն են, ինչո՞ւ ենք գովազդում»,- ասել է սենատորը։

Նրա խոսքով` օրինագիծը, եթե ընդունվի, կպարտավորեցնի ինչպես լրատվամիջոցներին, այնպես էլ համացանցի բոլոր ռեսուրսներին դադարեցնել նման արտիստների հիշատակումը, իսկ փաստաթուղթը կարող է նաև տույժ նախատեսել արգելքը խախտելու համար։ Ցեկովը համոզված է, որ արգելքին հետևելու դեպքում այս արտիստներին «մեկ տարի հետո ոչ ոք չի հիշի»։